Татарстан Премьер-министры вазифаларын башкаручы Равил Моратов хокук бозулар профилактикасы буенча хөкүмәт комиссиясе утырышын үткәрде

2010 елның 25нче апреленнән 15нче сентябренә кадәр Татарстан Республикасында “Курорт” планы үткәреләчәк. Әлеге план кысаларында ТР буенча эчке эшләр министрлыгы гражданнарның күмәкләшеп ял итү урыннарына аеруча зур игътибар юнәлтәчәк, елга һәм башка сулыкларда гражданнарның куркынычсызлыгын тәэмин итү буенча чаралар профилактикасы үткәреләчәк.

Моннан кала, су коену сезоны башлану белән “Акватория” операциясе дә старт ала.

Ул хакта бүген хокук бозулар профилактикасы буенча хөкүмәт комиссиясе утырышында ТР буенча эчке эшләр министры урынбасары – ТР буенча эчке эшләр министрлыгының иҗтимагый куркынычсызлык милициясе башлыгы Евгений Дәүләтшин хәбәр итте.

Утырыш видеоконференция тәртибендә узды. Чарада республиканың барлык муниципаль районнары да катнашты. Утырышны ТР Премьер-министры вазифаларын башкаручы Равил Моратов үткәрде.

Евгений Дәүләтшин, шулай ук, 2010 елда республикада 36 пляж, 26 парк ял зонасы, 263 ял базасы, 37 дәвалау-сәламәтләндерү учреждениесе эшләячәк, дип хәбәр итте. Шулай ук, урманнарда да ял итү урыннары булдырылачак. Милиция постлары халыкның күмәкләшеп ял итү урыннарына якын урнашачак, дип планлаштырыла. Аеруча зур игътибар балалар лагерьларына һәм ял итү урыннарына алып бара торган юлларга юнәлтеләчәк.

Дача җәмгыятьләрендә тәртип саклауны тәэмин итү максатларында бакчачылык җәмгыятьләре рәисләре белән очрашулар үткәрү, урыннарда кизү торулар оештыру каралган.

Сәламәтләндерү лагерьларында балалар һәм яшүсмерләрнең куркынычсызлыгын тәэмин итү өчен кайбер лагерьларда видеокүзәтү системаларын урнаштыру планлаштырыла.

ТР Премьер-министры вазифаларын башкаручы Равил Моратов федераль дәрәҗәдә эчке эшләр министрлыгы хезмәткәрләре санын 20%ка киметү турында карар кабул ителгәнен искә төшерде. Шуны истә тотып, ул республика территориясендә эшли торган шәхси саклау предприятиеләре белән хезмәттәшлек итәргә тәкъдим итте.

Комиссия утырышы барышында билгеләнгәнчә, сулыклар янында урнашкан ял итү урыннарына аеруча зур игътибар биреләчәк. 2009 елның су коену сезонында республикада 145 кеше батып үлгән (шуларның 42се – исерек хәлдә, 17 кеше – балалар).

ТР яшьләр эшләре, спорт һәм туристлык министры урынбасары Андрей Кондратьев республика территориясендә урнашкан балалар лагерьларында сулыкларга чыгу юлларын тәртипкә китерергә кирәклеген искә төшерде (барлыгы 25 сәламәтләндерү лагеренда балалар су коена ала).

Ул шулай ук бәлигъ булмаганнар эшләре буенча комиссиядә учетта торучы балалар һәм яшүсмерләрнең дә җәйге вакытта ял итәчәген искә төшерде (бәлигъ булмаганнар эшләре буенча комиссиядә учетта барлыгы 3,7 мең яшүсмер тора).

2010 елда хәрби-спорт лагерьлары Минзәлә, Чистай, Коркачи, Апаста оештырылачак.

ТР хезмәт, халыкны эш белән тәэмин итү һәм социаль яклау министры урынбасары Клара Таҗетдинова җәйге каникуллар вакытында бәлигъ булмаганнарны эш белән тәэмин итү турында сөйләде.

Аның сүзләренчә, узган елны 60 меңнән артык бала һәм яшүсмер эшкә урнаштырылган иде. 2010 елда да бу эшне дәвам итү каралган. Бу максатларга 41,6 млн. сум акча бүленеп бирелгән. Шул рәвешле 48 меңнән артык яшүсмерне эшкә урнаштырырга мөмкин булачак.

ТР мәгариф һәм фән министры урынбасары Айрат Зиннуров 2010 елда балаларның җәйге ялын оештыру чаралары белән таныштырды.
Әйтик, мәктәп каршындагы лагерьларда 83800 кеше ял итәчәк.

8 профильле смена оештыру каралган.

Иҗади яктан сәләтле балалар өчен республика Кара диңгез буенда алты смена ял оештырачак.

Шулай ук, ТР Министрлар Кабинетының 2009 елның 5нче ноябрендә кабул ителгән 761нче номерындагы “2010 елда балалар һәм яшьләр ялын, сәламәтләндерүен, мәшгульлеген оештыру турында” карарын укыгыз - http://prav.tatar.ru/rus/docs/post/post1.htm?page=13&pub_id=39288