Татарстан Президенты Рөстәм Миңнеханов VIII Бөтенроссия җәйге авыл спорт уеннарына әзерләнү һәм аларны үткәрү буенча оештыру комитеты утырышында катнашты

Бүген Татарстан Республикасы Президенты Рөстәм Миңнеханов 2010 ел VIII Бөтенроссия җәйге авыл спорт уеннарына әзерләнү һәм аларны үткәрү буенча оештыру комитеты утырышында катнашты.

Утырыш Мәскәүдә узды. Аны башкарма комитет рәисе - Россия Хөкүмәте рәисенең беренче урынбасары Виктор Зубков үткәрде.

Исегезгә төшерәбез: 2010 ел VIII Бөтенроссия җәйге авыл спорт уеннары 7-13нче июльдә Алабугада узачак.

Татарстан башлыгы Рөстәм Миңнеханов уеннарга әзерлек турында сөйләде. Ул барлык кирәкле хезмәтләр дә эшкә җәлеп ителгәнен, хезмәт күрсәтә торган инфраструктураның әзерләнгәнен, спорт объектлары һәм корылмаларының төзелгәнен билгеләп үтте. Эшләр расланган план буенча бара. Рөстәм Миңнеханов фикеренчә, республика Бөтенроссия җәйге авыл спорт уеннарын югары дәрәҗәдә үткәрәчәк.

Татарстан Президенты, шулай ук, Алабуганың үзенчәлекләре турында сөйләде. Әлеге шәһәрдә бөтен дөньяга танылган шәхесләр яшәгән һәм иҗат иткән (рәссам Иван Шишкин, табиб-психоневролог Владимир Бехтерев, "кавалерист-кыз" Надежда Дурова һ.б.). Буш вакытта авыл спорт уеннарында катнашучылар һәм кунаклар Алабуга буенча экскурсиягә йөреячәк.

Уеннарның башкарма комитет рәисе Виктор Зубков Татарстанның Россия дәрәҗәсендәге спорт ярышларын үткәрүгә әзер булганын билгеләп үтте. Ул 2010 ел җәйге авыл спорт уеннарына әзерлек эшләре лаеклы дәрәҗәдә башкарылачагында шикләнмәгәнен әйтте.

Утырышта Россия авыл хуҗалыгы министрлыгы, Россия спорт, туристлык һәм яшьләр сәясәте министрлыгы вәкилләре, Россия төбәкләр үсеше министры Виктор Басаргин чыгыш ясады.

Утырыштан соң Татарстан Республикасы яшьләр эшләре, спорт һәм туристлык министры вазифаларын башкаручы Марат Барыев хәбәр иткәнчә, Бөек Җиңүнең 65-еллыгы билгеләнеп үтелә торган елда VIII Бөтенроссия җәйге авыл уеннарының учагы Мәскәүдәге Мәңгелек уттан кабыныа китәчәген хәбәр итте.

Эстафета учагы Алабугага киләчәк. Эстафетада авыл спорт уеннарында ярышачак спортчылар катнашачак: Мәскәү, Владимир, Түбән Новгород өлкәләре, Чувашстан, Татарстан спортчылары. Эстафета учагының юлы нәкъ менә шушы төбәкләр аша уза.

Моннан кала утырышта VIII Бөтенроссия җәйге авыл спорт уеннарының символикасы һәм талисманы расланды.

Алабугада узачак авыл спорт уеннарының баш хакиме дә билгеле булды. Ул - РФ Дәүләт Думасы депутаты Илдар Гыйльметдинов.