ТАССРның 90 еллыгы көнендә 2013 елгы Универсиаданың 18нче объекты ачылды

Бүген Казанда ТАССРның 90 еллыгы көнендә 2013 елгы Бөтендөнья Универсиадасының 18 нче объекты - «КАИ-Олимп» спорт комплексының бассейны ачылды.

Бу чарада Татарстан Президенты Рөстәм Миңнеханов, РФ Федерация Советы Рәисенең беренче урынбасары Александр Торшин, Россия Дәүләт Думасы Рәисе беренче урынбасары Олег Морозов, ТР Премьер-министры Илдар Халиков, Казан мэры Илсур Метшин, Россия студентлар спорт берлеге Олег Матыцин, 2013 елгы Универсиада дирекциясе башлыгы Владимир Леонов һәм башка рәсми затлар катнашты.

Рөстәм Миңнеханов сәламләү сүзендә «Олимп» бассейнының 2013 елгы Универсиадага әзерлек кысаларында төзелә торган 30 федераль объектның 18 нче дип билгеләп үтте. “Бу бассейн Бөтендөнья студентлар уеннары алдыннан яшьләр 2013 елгы Универсиадада дәрәҗәле урыннар яулау өчен хәзердән үк күнегүләргә йөрсен дип ачыла”, - дип белдерде республика башлыгы. ТР Президенты төзүчеләргә һәм вуз җитәкчеләренә мондый яхшы бассейн өчен рәхмәт белдерде.

Александр Торшин үз чиратында татарстанлыларны ТАССРның 90 еллыгы һәм “Олимп” бассейны ачылу белән котлады. “Татарстан Республикасының шундый тиз үсеш алуы соклану һәм хөрмәт хисләре уята, үрнәк алырлык нәрсәләр бар”, - дип белдерде ул.

Сәламләү чыгышыннан соң төзүчеләр һәм 2013 елгы Универсиада волонтерлары бассейн хуҗаларына символик ачкыч тапшырды. Аннары дәрәҗәле кунаклар яңа объектны карады, анда ул вакытта «Олимп» белән «Синтез» командалары арасында ватерполо матчы бара иде. Шулай ук синхрон йөзү буенча Россия чемпионнары - Чаллы командасы осталыклары белән шатландырды.

«КАИ-Олимп» физкультура-сәламәтләндерү объекты 2008 елда Казанның Яңа Савин районында вузның 2 нче бинасы янында торгызылган иде. Менә бүген ТАССРның 90 еллыгын бәйрәм итү көнендә спорт объектының икенче чираты - «Олимп» бассейны файдалануга тапшырылды.

Владимир Леонов сүзләренчә, бу объектның төзелешенә федераль бюджеттан 2013 елгы Уеннарга әзерлек программасы буенча юнәлдерелгән 500 млн.сум тирәсе акча сарыф ителгән. Универсиада көннәрендә бассейнда су полосы һәм йөзү буенча башлангыч турнир ярышлары үткәреләчәк. Июль аенда биредә халыкара старт – су астыннан йөзү буенча Ауропа чемпионаты узачак.

«КАИ-Олимп» мәдәни-спорт комплексы директоры Ринат Йосыпов сүзләренчә, мондый бассейн Ауропадада бик аз. Бассейнның озынлыгы 50 м, тирәнлеге – 2,3-2,6 м, бу үлчәмнәр югары дәрәҗәле ярышлар үткәрү таләпләренә туры килә.

“Бассейнда КДТУ-КАИ студентлары, университетның җыелма командалары, балалар-яшүсмерләр спорт мәктәпләрендә укучылар өчен физкультура һәм йөзү дәресләре узачак, шулай ук биредә районнарда һәм шәһәрләрдә яшәүчеләр дә шөгыльләнә ала”, - диде Ринат Йосыпов.