ТР Президенты Пекин спорт университеты делегациясе белән очрашты

ТР Президенты Рөстәм Миңнеханов Татарстан Республикасы Хөкүмәте йортында Пекин спорт университеты делегациясен кабул итте, дип хәбәр итә ТР Президентының матбугат хезмәте.

Искәртеп узабыз, Пекин спорт университеты президенты Ху Ян җитәкчелегендәге делегация вәкилләре Казанга ике көнлек визит (27-28 май) белән килде. Аларның Татарстан башкаласына ясаган визитларының бер максаты – 2013 елгы Бөтендөнья җәйге студентлар спорт уеннарына әзерлекнең барышы белән танышу.

Кытай делегациясе 2013 елгы Универсиада уңаеннан төзелгән спорт корылмаларын карады, Универсиада авылында булды, “КАИ-Олимп” спорт комплексының йөзү бассейнын ачу тантанасында катнашты, шулай ук Казан (Идел буе) федераль университетында булды.

ТР Президенты Рөстәм Миңнеханов билгеләп үткәнчә, Татарстан Россия-Кытай мөнәсәбәтләре кысаларында Кытай белән хезмәттәшлек итү мөмкинлеген югары бәяли. Ул Кытай һәм Татарстан Республикасын күпьеллык хезмәттәшлек бәйләвен искәртте.

Мисал өчен, 2007 елның мартында Кытай Халык Республикасы рәисе Ху Цзиньтао Россия Федерациясенә визиты барышында Татарстан Республикасында булды. 2008 елның маенда Шаньдун провинциясенең Хөкүмәт делегациясе Татарстан Республикасына визит белән килде, аның кысаларында ТР Хөкүмәте һәм Шаньдун провинциясе Хөкүмәте арасында сәүдә-икътисади һәм фәнни-техник хезмәттәшлек өлкәсендә Хөкүмәтара килешү имзаланды.

2009 елның апрелендә Шаньдун провинциясе делегациясенең Татарстанга визиты барышында ТР Яшьләр эшләре, спорт һәм туристлык министрлыгы һәм Шаньдун провинциясенең физик культура һәм спорт эшләре идарәсе арасында физкультура, спорт һәм туристлык өлкәсендә хезмәттәшлек итү турындагы килешүгә кул куелды.

“Шеньчженьнең Универсиадага әзерлек эшендәге тәҗрибәсе безнең өчен бик мөһим, - диде Рөстәм Миңнеханов. – Без Шеньчжень вәкилләре белән даими элемтәдә торабыз”.

“Бүгенге көндә Кытай спортчыларының Халыкара ярышларда яулаган күпсанлы җиңүләрен һәркем үзенчә аңлата, - диде Рөстәм Миңнеханов. - Әмма Пекин спорт университетында булып, аның базасын, ничек шөгыльләнүләрен үз күзләрем белән күргәч, мин сезнең спортчылар ирешкән нәтиҗәләрне һәм Кытай спортының үсеш перспективаларын бәяләдем”.

“Казанны хаклы рәвештә Россия спорт башкалаларының берсе дип атыйлар, - дип белдерде Рөстәм Миңнеханов. – Без массакүләм спортны һәм югары казанышлар спортын үстерүгә зур игътибар бирәбез”.

Ул Чаллыдан Кама физкультура, спорт һәм туристлык дәүләт академиясен республика башкаласына күчергәннән соң, Казанда Татар дәүләт физкультура, спорт һәм туристлык академиясе ачылачагын искәртте.

“Бүген безгә сезнең визиттан файдалану һәм спортны үстерү өлкәсендә хезмәттәшлек тәкъдим итү мөһим, - диде Рөстәм Миңнеханов. – Киләчәктә без Пекин спорт университеты һәм безнең Физкультура, спорт һәм туристлык академиясе белән килешү төзергә телибез. Бу яңа вузга бик зур ярдәм булыр иде. Моннан тыш, без сезне, Ян әфәнде, Физкультура, спорт һәм туристлык академиясенең Попечительләр советы составында күрергә телибез”.

Татарстан Президенты Пекин спорт университетының киләчәктә үсешен дәвам итәчәгенә һәм алга таба Физкультура, спорт һәм туристлык академиясенең Кытай вузының партнерларыннан берсе булачагына ышаныч белдерде.

Үз чиратында, Пекин спорт университеты президенты Ху Ян Казанда җылы кабул иткәне өчен Рөстәм Миңнехановка рәхмәт белдерде. Ул визит барышында Татарстанда мәгариф һәм спорт үсешенә нинди мөнәсәбәттә торуларын үз күзләре белән күрүен әйтте. Ян әфәнде Казан вузларында белем алучы студентларның күплегенә хәйран калуын белдерде.

“Казан – җитди белем бирү үзәге. Шәһәрдә яшәүче миллионнан артык кешенең 160 меңгә якынын студентлар тәшкил итә”, - диде Пекин спорт университеты президенты.

Пекин спорт университеты президенты Ху Ян ТР Яшьләр эшләре, спорт һәм туристлык министрлыгы, Универсиада-2013 башкарма дирекциясе вәкилләренә һәм шәхсән Россия студентлар спорт берлеге президенты Олег Матыцинга Татарстан башкаласына визитны оештырганнары өчен рәхмәт белдерде.