Илдар Халиков: “Татарстанда террористик юнәлешле җинаятьләрне кисәтү буенча шактый тәҗрибә бар”

Бүген террористик юнәлешле җинаятьләрне тикшерү мәсьәләләре буенча БДБ илләре алдан тикшерү органнары вәкилләре катнашында Казанның “Корстон” сәүдә-күңел ачу комплексында халыкара фәнни-гамәли конференция башланды.

РФ Прокуратурасы карамагындагы Тикшерү комитеты рәисе урынбасары Юрий Нырков җитәкчелегендә ике көн рәттән барачак әлеге чараның ачылу тантанасында, ТР Премьер-министры Илдар Халиков анда катнашучыларны ТР Президенты Рөстәм Миңнеханов, ТР Хөкүмәте һәм шәхсән үз исеменнән сәламләп, Татарстанның икътисади, фәнни һәм аеруча сәнәгать комплексы үсеш кичергән Россия Федерациясе төбәкләренең берсе булуын һәм халыкара хезмәттәшлек буенча БДБ илләренең күпчелеге белән төрле өлкәдә үзара ныклы элемтәләр урнаштыруын искәртте. “Бүген терроризм куркыныч яный, беләбез: ул Россиядә генә түгел, бөтен дөнья күләмендә вазгыять тотрыклылыгын какшата, бигрәк тә күп кеше җыелган урында террористик актлар оештырыла, шул рәвешле, милли, социаль, яшь үзенчәлекләренә, сәяси һәм дини карашларның нинди булуына карамастан, бер гаепсез кешеләрнең үлеменә китерә”, - диде И.Халиков.

2013 елда Татарстан башкаласы Казан Универсиадага 13 меңнән күбрәк спортчы, тренер һәм табип, 50 меңнән күбрәк кунак каршы алачагын исәпкә алып, халыкара конференциянең нәкъ менә Казанда узуы әһәмиятле. Россия Федерациясе субъектлары гына түгел, шулай ук БДБ илләре туплаган тәҗрибәне дә өйрәнү, хокук саклау органнары белән укыту үзәкләрендә махсус очрашулар үткәрү отышлы, чөнки террорчылыкка каршы көрәштә коллегаларыбыз һәм партнерларыбыз белән якыннан аралашу – көн таләбе. Безнең Эчке эшләр министрлыгы системасындагы хокук саклау органнары, Прокуратура, Тикшерү комитеты хезмәттәшлеге күп милләтле җәмгыятьтә дини һәм социаль экстремизмга каршы торуны, толерантчыл карашларны ныгытуны нәтиҗәле итә, дип басым ясап әйтте ул. Террористик җинаятьләргә каршы көрәш юнәлешендә көчләрне туплап, булган тәҗрибәне үзара уртаклашу – заман таләбе, Татарстанда исә террористик юнәлешле җинаятьләрне кисәтү буенча шактый тәҗрибә бар. “Террорчылык күптән инде илкүләм җинаять кенә түгел, ул - интернациональ җинаять, ягъни аның “җиле”, кагыйдә буларак, күп кенә илләргә кагыла”, - дигән фикердә ТР Хөкүмәте башлыгы.