Виктор Зубков: “Авыл хуҗалыгындагы вәзгыять гади түгел”

Җәй коры килү сәбәпле, Россия авыл хуҗалыгы өлкәсендәге вәзгыять гади түгел, әмма ил җитәкчелеге авыл хуҗалыгы тауар җитештерүчеләренә ярдәм итү чараларын эзли. Бу хакта бүген Алабугада узган киңәшмәдә беренче вице-премьер Виктор Зубков белдерде. Киңәшмәдә Татарстан Президенты Рөстәм Миңнеханов та катнашты.
“Алабуга” махсус икътисади зонасында узган киңәшмәдә Виктор Зубков Россиянең 14 төбәгендә, шул исәптә Татарстанда аномаль югары температура һәм корылык дип билгеләп үтте. “Моннан тыш, тагын 3 төбәк шундый ук проблема турында белдерә”, - диде беренче вице-премьер.
РФ авыл хуҗалыгы министрының якынча бәяләвенчә, Россиядә 9 миллион гектарда бөртекле культура чәчүлекләре үлгән. “Терлекчелек зыян күрмәсен өчен азык әзерләү буенча чаралар күрү мөһим”, - дип белдерде Виктор Зубков.
Беренче вице-премьер белдерүенчә, 1 июльгә булган мәгълүматлар буенча узган елдан калган ашлык 24 миллион тонна тәшкил итә, шул исәптә 9,5 миллион тонна - интервенцион фонд ашлыгы. Моннан тыш, 5 миллион тоннадан артык яңа уңыш җыелган. Шуңа күрә, беренче вице-премьер фикеренчә, ашлыкка эчке ихтыяҗны канәгатьләндерү белән бәйле проблема юк.