Равил Моратов: “Һәр егетнең армиягә һөнәр яки хәрби-исәп белгечлеге алып китүенә ирешергә кирәк”

Бүген Россиядә РФ Кораллы Көчләренә чакырылыш төгәлләнде. ТР Министрлар Кабинетында беренче вице-премьер - республика чакырылыш комиссиясе урынбасары Равил Моратов рәислегендә узган ТР чакырылыш комиссиясе утырышында Татарстанда 2010 елгы язгы чакырылыш кампаниясенә нәтиҗәләр ясалды.

Татарстан хәрби комиссары Сергей Погодинның сүзләренә караганда, республикада язгы чакырылыш тулаем алганда оешкан төстә узган. Шәһәр-районнарда чакырылышны тәэмин итү буенча чараларны үтәмәү һәм хокук бозу очраклары теркәлмәгән. Быел армиягә 7 меңнән артык татарстанлы киткән. Чакырылыш комиссияләренә 30476 граждан чакырылган, шуларның 99,3 проценты килгән. 193 татарстанлы армиягә барудан качып йөргән. Аларның күпчелеге хәрби хезмәткә яраклы.

Гражданнарны армиягә озату Идел буе-Урал хәрби округы штабы раслаган план нигезендә 2010 елның 19 апрелендә башланып, 2010 елның 11 июленә кадәр дәвам иткән.

Май ахырында Татарстан Республикасыннан Ерак Көнчыгышка тиешле барлык әйберләр белән тәэмин ителгән өч хәрби эшелон озатылган. Татарстан Республикасыннан хәрби эшелон командалары составында 900 гә якын егет киткән, шуларның 400 е “машина йөртүче” белгечлеге буенча.

Язгы чакырылышта югары һәм урта һөнәри белем алган 4104 егет (шуларның 2016 сы укуны тәмамлаган) армиягә озатылган. Бу билгеләнгән норманың 57 проценты дигән сүз.

Быелгы чакырылышта Кораллы Көчләргә “Төбәк оборона спорт-техника оешмасы” (ДОСААФ) системасында әзерләнгән 3128 белгеч киткән.

Татарстан Республикасының югары һәм урта һөнәри белем бирү йортлары гражданнарны хәрби-исәп белгечлекләре буенча әзерләүгә саллы өлеш керткән.

Язгы чакырылышта Татарстан егетләре Россия Федерациясенең барлык төбәкләренә хәрби хезмәткә озатылган. Гражданнарның күпчелеге Россиянең Үзәк өлешендә - Идел буе-Урал, Мәскәү, Ленинград хәрби округларында хезмәт итәчәк.

2010 елгы язгы чакырылыш барышында ТР Хәрби комиссариаты егетләрне шефлыкка алынган хәрби частьләргә чакырылыш буенча хәрби хезмәткә озаткан. Шундый 45 хәрби частькә 1728 егет җибәрелгән. Бу чакырылышта Чаллыдан Севастопольгә Кара диңгез флотына 200 дән артык граждан озатылган. Моннан тыш, Кара диңгез флоты частьләрен комплектлаштыру өчен Севастопольгә Казан дәүләт медицина университетын тәмамлаган 25 кеше киткән.

Югарыда бәян ителгәннәргә нәтиҗә ясап, Равил Моратов комиссия әгъзаларына башкарган эшләре өчен рәхмәт белдерде һәм ТР Президентының РФ Оборона министрлыгы тарафыннан үткәрелә торган конкурста дүртенче мәртәбә беренче урынны алу бурычын куюы хакында искәртте. “Бу бурыч гадиләрдән түгел, шунлыктан нәтиҗәле эшчәнлек алып барырга кирәк”, - диде ул.

Моннан тыш, беренче вице-премьер чакырылыш комиссиясе әгъзалары һәм урыннардагы коллегаларга хәрби хезмәттән кайткан егетләрне эшкә урнаштыру мәсьәләсенә игътибар итәргә чакырды.

Равил Моратов шулай ук хәрби комиссариат хезмәткәрләре һәм шәһәр-районнарның чакырылыш комиссияләре әгъзаларына хәрби-исәп белгечлеге алмаган һәм һөнәри белеме булмаган егетләрне армиягә озатмаска чакырды.

“Һәр егетнең армиягә һөнәр яки хәрби-исәп белгечлеге алып китүенә ирешергә кирәк”, - дип сүзен йомгаклады беренче вице-премьер.