Рөстәм Миңнеханов: “Икенчел базардан сайланган фатирларда ветераннар өчен барлык уңайлыклар булырга тиеш”

23 июль иртәсенә булган мәгълүматларга караганда, 2005 елның 1 мартыннан соң торак шартларын яхшырту өчен чиратка баскан сугыш ветераннары реестрында 11 мең 415 кеше исәпләнә. Бүгенге көндә аларның 9291е фатир сайлау турындагы беркетмәгә нигезләнеп килешү төзегән. Килешүләрнең 2794е – торак шартларын яхшырту өчен социаль ипотека программасын сайлау турында, 1391 килешү ТР Баш инвестиция-төзелеш идарәсе (аз катлы һәм шәхси йортлар төзелеше) аша төзелгән. Килешүләрнең 53 проценты (4895е) икенчел торак базарыннан әзер фатирлар сайлау турында. Бу мәгълүматларны бүген ТР Министрлар Кабинетында Президент Рөстәм Миңнеханов рәислегендә узган видеокиңәшмәдә ТР хезмәт, мәшгульлек һәм социаль яклау министры Айрат Шәфигуллин җиткерде.

Бүген проблема нәкъ менә торакны икенчел базардан сайлаучылар белән килеп чыга. Аларның күбесе 1 майдан соң чиратка басучылар. Әзер фатир табып, килешүләр төзелсә дә, федераль үзәктән өстәмә субсидияләр һаман да әле килмәү сәбәпле, ветераннар фатирларга урнаша алмый. Билгеле булганча, РФ Төбәкләр үсеше министрлыгы 2010 елгы федераль бюджетка үзгәрешләр кертү буенча тәкъдимнәр әзерләгән иде. Аның нигезендә, 2005 елның 1 мартыннан соң чиратка баскан ветераннарның торак шартларын яхшырту өчен 35,9 млрд. сум күләмендә өстәмә финанслар бүлеп бирү планлаштырыла. Өстәмә финансларның Татарстанга каралган өлеше 2 млрд. сумга якын. Күптән түгел федераль бюджетка үзгәрешләр Федерация Советы тарафыннан да расланды. Инде август аенда кирәкле финанслар төбәкләргә, шул исәптән Татарстанга килеп җитәр дигән ышаныч бар.
Хезмәт, мәшгульлек һәм социаль яклау министры Айрат Шәфигуллин хәбәр иткәнчә, август аенда федераль үзәктән Татарстан ветераннарының торак шартларын яхшырту өчен гомумән алганда 4 млрд. сумнан артык финанслар килүе көтелә.

Президент Рөстәм Миңнеханов ветераннар өчен икенчел торак базарыннан әзер фатирлар сайлаганда, бик игътибарлы булырга, намуссыз сатучыларга эләгеп алданмаска чакырды. Аның белдерүенчә, икенчел базардан сайланган фатирларның ветераннар өчен барлык уңайлыклары булырга тиеш. Республика башлыгы бу процессның нинди дәрәҗәдә тиешле министрлык-ведомстволар тарафыннан контрольдә тотылуы белән кызыксынды. Айрат Шәфигуллин белдергәнчә, муниципаль берәмлекләрнең Башкарма комитетларында бу мәсьәлә белән махсус торак комиссияләре шөгыльләнә. Моннан тыш, Дәүләт торак фонды, Баш инвестиция-төзелеш идарәсе белән төзелгән килешүләрдән аермалы буларак, ветераннарның икенчел базардан торак сайлаулары турындагы килешүләре Дәүләт теркәү палатасында теркәлү узганнан соң гына кабул ителә.