ТР Президенты Лениногорски балалар йортында тәрбияләнүчеләргә микроавтобус бүләк итте

Бүген Татарстан Президенты Рөстәм Миңнеханов Әлмәт һәм Лениногорскига эшлекле визиты кысаларында Лениногорски балалар йортында булды. Республика башлыгы “Татнефть” ААҖ исеменнән балалар йорты директорына “Нефтьчеләр – Татарстан балаларына” шигаре астында «Fiat Ducato» микроавтобусы ачкычын тапшырды.

ТР Президенты визит кысаларында шулай ук балалар йотында тәрбияләнеп чыгучыларның яшь гаиләләренә - телевизорлар, ә биредә тәрбияләнүчеләргә 6 компьютер һәм хоккей, футбол, фигуралы шуу белән шөгыльләнү өчен спорт җиһазлары бүләк итте.

Ятимнәр һәм ата-ана тәрбиясеннән мәхрүм балаларны сыендырган “Лениногорски балалар йорты” дәүләт белем бирү учреждениесе 1995 елның 31 авгусында 1 нче интернат-мәктәпнең йокы корпусы базасында ачыла. Балалар йорты базасында 2004 елдан алып Глазово авылында “Ялкын” шәһәр яны сәламәтләндерү лагеры эшләп килә.

Бүгенге көндә балалар йортында республиканың 5 районыннан 2 яшьтән 18 яшькә кадәрге 51 бала тәрбияләнә. Алар аерым фатирларда биш гаиләдә яши. 15 ел эчендә биредә 248 бала үзенә сыену урыны тапкан, 91 бала гаиләгә билгеләнгән. “Бездә тәрбияләнүчеләр өчен 5 гаилә формалаштырылган, аларның һәркайсында төрле яшьтәге балалар яши, - диде балалар йорты директоры Раушан Мортазина. – Бу олы яшьтәгеләр кечкенәләр турында кайгыртырга, ә иң кечкенәләр өлкәннәрне хөрмәт итәргә өйрәнсен өчен эшләнә”.

Балалар йорты директорының сүзләренә караганда, соңгы елларда республика бюджеты акчалары хисабына инженер челтәрләренә, санитар-гигиена узелларына капиталь ремонт ясалган, янгын сүндерү системасы монтажланган. “Татнефть” ААҖ һәм шәһәр предприятиеләре ярдәме белән торак бүлмәләр, фойе, дуслар өчен бүлмә, медицина блогы, музей, китапханә, өстәмә белем бирү кабинетлары төзекләндерелгән. Бинаның фасадын ремонтлау һәм территорияне тәртипкә китерү мәсьәләсе исә хәл итүне көтә.

ТР Президентына шулай ук инде 13 ел дәвамында эшләүче “Минем йорт – минем гаилә” музеенда җыелып килгән балалар йортында тәрбияләнүчеләрнең эшләрен күрсәттеләр.