Рөстәм Миңнеханов: “Динамо-Казан” – үзенчәлекле команда”

Бүген Казан Кремлендә “Динамо-Казан” чирәмдәге хоккей командасын хөрмәтләделәр. Татарстан Президенты Рөстәм Миңнеханов спортчыларны җиденче мәртәбә Россия чемпионы исемен яулаулары белән котлады.

Р.Миңнеханов үзенең сәламләү сүзендә Кремльдә Россия һәм Халыкара ярышларда җиңүчеләрне хөрмәтләү күркәм традициягә әверелүен билгеләп үтте. “Бүген без биредә чирәмдәге хоккей буенча Россиянең 7 тапкыр чемпионнарын – “Динамо-Казан” клубын хөрмәтлибез. Команда оешуга тиздән 30 ел тулачак, әлеге юбилей алдыннан сез чираттагы мәртәбә алтын медаль яуладыгыз”, - дип ассызыклады республика Президенты.

“Безне еш кына Татарстанның югары лигада чыгыш ясаучы командаларында, нигездә, читтән чакырылган спортчылар гына уйный дип тәнкыйтьлиләр, - диде Рөстәм Миңнеханов. - Ә сезнең командада чыгыш ясаучы спортчыларның 13 е – Казаннан, 5 се – Яшел Үзәннән. Бу бик тә уңай күренеш”.

Республика башлыгы “Динамо-Казан” командасының чираттагы уңышына ярдәм итүчеләрнең барысына да – уенчыларга, тренер Араик Маргарянга, Казан мэры Илсур Метшинга, ТР эчке эшләр министры Әсгать Сәфәровка, клубның иганәчеләренә рәхмәт белдерде.

“Без сезнең белән горурланабыз, сезне барлык татарстанлылар да котлый һәм яңадан-яңа җиңүләр тели. Миндә киләсе сезонның да уңышлы булачагында бернинди шик тә юк”, - дип мөрәҗәгать итте Рөстәм Миңнеханов командага.

Рөстәм Миңнеханов “Динамо-Казан” командасы җитәкчеләре һәм уенчыларына дәүләт бүләкләре тапшырды. Клуб президенты Евгений Корольков “Фидакарь хезмәте өчен” медаленә лаек булды. Татарстан Президенты берничә уенчыны “Казанның 1000 еллыгы истәлегенә” медале белән бүләкләде, ә клубның директоры Ринат Әхәтовка “Татарстан Республикасының атказанган физик культура хезмәткәре” дигән мактаулы исем бирелде. Команданың баш тренеры Араик Маргарян ТР Президентының Мактау хаты белән бүләкләнде.

А.Маргарян Рөстәм Миңнеханов һәм республика җитәкчелегенә клубка зур игътибар күрсәткәннәре өчен рәхмәт белдерде. “Безнең әле иң зур җиңүләр алда булыр дип өметләнәм”, - диде “Динамо-Казан”ның баш тренеры.

Россия чемпионнарын РФ Чирәмдәге хоккей федерациясе президенты Сергей Чеченков та тәбрикләде. Ул билгеләп үткәнчә, Татарстанда спортны үстерү өчен күп нәрсә эшләнә һәм монда республика җитәкчелегенең өлеше зур. Россия Чирәмдәге хоккей федерациясе җитәкчесе Татарстан Президенты Рөстәм Миңнехановка Россия чемпионатының алтын медален тапшырды.

Спортчылар исә Татарстан Президентына “Динамо-Казан” командасы коллективының фотосурәтен һәм уенчыларның автографлары куелган кәшәкә бүләк итте. Соңыннан уенчылар Рөстәм Миңнеханов белән бергә истәлеккә фотога төште.