Рөстәм Миңнеханов: “Татарстанда гаилә сөт фермалары төзү өстенлекле юнәлешкә әверелергә тиеш”

Татарстанда гаилә сөт фермалары төзү өстенлекле юнәлешкә әверелергә тиеш. Бүген ТР Президенты Рөстәм Миңнеханов Кукмара муниципаль районында узган “Гаилә сөт фермаларын үстерү” дигән республика семинар-киңәшмәсендә әнә шулай дип белдерде.

Республика башлыгы фикеренчә, заманча гаилә сөт фермалары, сөт җитештерүдән тыш, күп кенә башка бурычларны да хәл итә: авыл районнарында өстәмә эш урыннары булдыра, авылда традицион тәртипне саклый, балаларны тәрбияләүдә дә файдасы зур.

Рөстәм Миңнеханов бу җәйдә Кукмара районы хакимияте һәм ТР Авыл хуҗалыгы һәм азык-төлек министрлыгы катнашында район территориясендә оештырылган гаилә фермаларына югары бәя бирде.

ТР Премьер-министры урынбасары – ТР авыл хуҗалыгы һәм азык-төлек министры Марат Әхмәтов киңәшмәдә катнашучыларга искәртеп үткәнчә, ТР Президенты күрсәтмәсе буенча Татарстанда быел һәр районда ким дигәндә 5 гаилә фермасы оештырылырга тиеш.

“Гаилә фермалары” программасы нигезендә “Россия авыл хуҗалыгы банкы” ААҖ тарафыннан крестьян (фермер) хуҗалыкларына еллык 15 процент белән 8 елга кредитлар бирелә.

ТР Авыл хуҗалыгы һәм азык-төлек министрлыгы тарафыннан фермаларны җиһазландыру өчен җиһаз бәясенең яртысы каплана.

Татарстанның Кукмара районы фермерлары – Аш-Бузи авылыннан Илфат Сафин һәм Сәрдекбаш авылыннан Рәдиф Әхмәтов программа шартларыннан беренче булып файдаланган. Бүген Татарстан Президенты һәм киңәшмәдә катнашучылар аларның фермаларында булды.

Илфат Сафин бурычка алынган 2,9 миллион сум акчага (үзенеке – 500 мең сум) 32 баш сыерга исәпләнгән терлекчелек бинасы төзегән һәм тиешле технология җиһазлары сатып алган. 800 мең сумга нәселле терлек сатып алынган. Фермер елына 120 тонна (шуның 110 тоннасы – сату өчен) сөт җитештерергә ниятли. Ике эш урыны булдырылган. Проектның чыгымнары 5 ел эчендә капланачак.

Рәдиф Әхмәтов бурычка алынган 4,4 миллион сум акчага (үзенеке – 900 мең сум) 50 баш сыерга исәпләнгән терлекчелек бинасы төзегән һәм тиешле технология җиһазлары сатып алган. 1 миллион сумга нәселле терлек сатып алынган. Фермер елына 120 тонна (шуның 110 тоннасы – сату өчен) сөт җитештерергә ниятли. Ике эш урыны булдырылган. Проект үзен 5 ел эчендә аклаячак.