Бүген “Алтынчәч” тоннель казу комплексы “Завод” һәм “Мәскәү” станцияләрен тоташтырды

Бүген “Алтынчәч” тоннель казу комплексы Авиатөзелеш районыннан Мәскәү районына килеп җитте. ТР Президенты Рөстәм Миңнеханов әлеге вакыйганың шаһиты булды. Ленин исемендәге Мәдәният сарае янәшәсендәге “Завод” станциясен “Мәскәү” станциясе белән тоташтыручы 1320 метр озынлыктагы тоннельне “Алтынчәч” 6 ай ярым вакыт эчендә узган. “Казметрострой” МУП җитәкчесе Марат Рәхимов моны бик яхшы тизлек һәм яхшы нәтиҗә дип бәяләде. “Моңа тотрыклы финанслар булу исәбенә ирешелде. Тоннель казу өчен кирәкле булган боҗралар, башка материаллар белән тәэмин ителештә тоткарлыклар булмады”, - ди ул. Шул рәвешле, “Алтынчәч” Авиатөзелеш районыннан Декабристлар урамына таба аена уртача 200 метрдан артык ара уза алган. Эшләр тулысынча республика казнасы исәбенә алып барыла. Марат Рәхимов сүзләренә караганда, әле узган ел гына дәүләт ярдәме кысаларында Казан метрополитены төзелешенә федераль бюджеттан күпмедер финанслар алынса, быелдан башлап бу эшләр тулысынча Татарстан казнасы җилкәсенә төшә. Быел метро төзелешенә республика бюджетыннан 2,6 млрд. сум бүленгән. Ел ахырына кадәр тоннель казу эшләренә өстәмә рәвештә тагын 700 млн. сум таләп ителә. Марат Рәхимов хәбәр иткәнчә, 1 октябрьдә “Мәскәү” станциясеннән Мәскәү базары янәшәсендә урнашачак “Декабристлар” станциясенә таба тоннель казыла башлаячак. Ә якын көннәрдә “Айсылу” комплексы “Завод” станциясеннән Мәскәү районына таба икенче тоннель казуга керешәчәк. 1 ноябрьдән “Сөембикә” комплексы “Декабристлар” станциясеннән “Кәҗә Бистәсе”нә таба юл ала.

“Мәскәү” метро станциясе Декабристлар урамында төзелеп бетмәгән тимер юл вокзалы янәшәсендә урнашкан. Платформа өлеше конструкциясе ике аралыктан торачак. Ике җир асты вестибюле төзү планлаштырыла. Аларны ярдәмче бина блогы тулаландырачак. Конструкция монолит тимер бетоннан эшләнә. Әлеге станция төзелеше “Татнефть” нең янәшәдә генә урнашкан автомобильләргә ягулык салу станциясен күчерү мәсьәләсен актуальләштергән иде. Төзелеш мәйданы территориясендә калган АЗС бүген эшләми, әмма урыныннан да күчерелмәгән. “Эшләрне бит туктатып булмый. Шуның өчен метро төзүчеләргә АЗС ны урап, артык метрлар узарга туры килде”, - ди “Казметрострой” җитәкчесе. Метро төзүчеләр бу проблеманың шәһәр җитәкчелеге тарафыннан тиз арада чишелеш табуына өметләнә. Президент белән бергә бүгенге чарада катнашкан Казан мэры Илсур Метшин ягулык салу станциясен күчерү өчен урынның инде күптән әзер булуын, мәсьәләнең компенсация суммасына терәлеп калуын белдерде. АЗС хуҗалары экспертиза нәтиҗәләренә нигезләнеп шәһәр тәкъдим иткән 15 млн. сум белән канәгатьләнмичә, компенсацияне 40 млн. сумнан арттыруны сорый. Шәһәр башлыгы шулай да бу мәсьәләдә үзара аңлашу табылыр, дип белдерә.

Бүген ТР Президенты Рөстәм Миңнехановка Казан метрополитенын үстерү, сафка басачак станцияләр схемалары да тәкъдим ителде. “Казметрострой” җитәкчесе Марат Рәхимов иң мөһим бурыч дип Универсиадага кадәр, ягъни 2013 елга әлеге станцияләр комплексын файдалануга тапшыруны атады. Ә инде “Кәҗә Бистәсе” станциясен (әлегә шартлы исем) финанслауда тоткарлыклар чыкмаса, бу ел ахырында сафка бастырырга ниятлиләр. Биредә эшләрнең инде 95 проценты башкарылган. Җиһазлар кую, җайлау эшләрен башкару һәм эшләтеп җибәрү өчен финанслар кирәк.

Соңыннан Рөстәм Миңнеханов “Кәҗә Бистәсе” станциясендәге төзелешнең барышы белән танышты.