ТР Премьер-министры Илдар Халиков Татарстанның Лениногорски районына сәфәр кыла

Бүген ТР Премьер-министры Илдар Халиков Татарстанның Лениногорски районына сәфәр кыла. ТР Премьер-министрын эш сәфәрендә Лениногорски муниципаль районы башлыгы Рәгать Хөсәенов, ТР хезмәт, мәшгульлек һәм социаль яклау министры Айрат Шәфигуллин һәм башка рәсми затлар озатып йөри.

Лениногорскига килү белән Татарстан Хөкүмәте башлыгы һәм аны озатып йөрүче затлар Мәңгелек утка чәчәкләр салды һәм Геройлар аллеясында Дан орденының тулы кавалерлары Михаил Алаев, Габдулла Мотыйгуллин һәм Яков Николаевка барельефлар ачу тантанасында катнашты. Ачылыш тантанасында Россия геройларының туганнары да бар иде. Бөек Ватан сугышы фронтларында һәлак булучылар истәлеген бер минут тынлык белән искә алдылар.

Лениногорски районыннан сугышка 11666 кеше киткән, шуларның яртысыннан артыгы яу кырында ятып калган. Геройларның исемен мәңгеләштерү өчен Лениногорскида Мәңгелек ут һәм Җиңүче солдатка һәйкәл урын алган Геройлар аллеясы булдырылган. 2005 елда һәйкәл ансамбленә реконструкция ясалган һәм өстәмәләр кертелгән. Бөек Җиңүнең 65 еллыгы уңаеннан аллея таштан эшләнгән яңа елъязма – һәлак булучылар исемлеге белән тулыландырылган.

Җирле үзидарә органнары, Лениногорски ветераннар иҗтимагый оешмасы шәһәр һәм район советы инициативасы белән Лениногорскиның 55 еллыгы уңаеннан Советлар Союзы Геройлары аллеясында Дан орденының өч тулы кавалерына барельефлар урнаштыру турында карар кабул ителә. Мемораиль комплекс булдыруга Бөек Ватан сугышында Җиңүнең 65 еллыгы уңаеннан оештырылган шәһәр һәм район фондыннан акча бүлеп бирелә.

Бүген барельефны ачу тантанасында мактаулы кунакларга Лениногорскиның 55 еллыгы уңаеннан сугыш һәм хезмәт ветераннары район һәм шәһәр советы рәисе Марс Исхаков язган “Лениногорски – Дөнья, Россия, Татарстан рекорды” дигән китап бүләк иттеләр.

Тантаналы митингтан соң Илдар Халиков күпфатирлы торак йортта Бөек Ватан сугышы ветераннары өчен сатып алынган фатирларны карады. Бу йортта ветераннарның торак шартларын яхшырту программасы кысаларында сугыш ветераннары өчен барлыгы 7 фатир сатып алынган. Горький урамында урнашкан торак йорттагы 15 фатирның 10 сы – бер, 5 се – ике бүлмәле.

Премьер-министр шулай ук шәһәрдәге истәлекле урыннарның берсен – 1968 елда ачылган Нефть музеен карады. Музейның 600 квадрат метр мәйданны биләгән дүрт залында Татарстанда нефть ятмаларын эзләү, разведка ясау һәм ачу турында 1 меңнән артык экспонат урын алган. Татар нефтенең 60 еллыгы алдыннан музейда “Татнефть” ААҖ бүлекчәсе – “Лениногорскнефть” нефть һәм газ чыгару идарәсе тарихына багышланган экспозиция ачылган. Музей ачылганнан бирле биредә 550 меңнән артык кеше булган.

Көннең икенче яртысында Илдар Халиков “Бәкер” шифаханәсендә дәвалау-диагностика базасы белән танышачак.