Илдар Халиков: “Актанышның юбилее – бөтен республика өчен зур бәйрәм”

Татарстанның Актаныш районын табигатенең гүзәллеге генә түгел, халкының рухи матурлыгы да аерып тора. Бүген Актаныш авылының – 300, районның 80 еллыгын бәйрәм итәргә килгән һәркем шул фикерне белдерде.

Районда яшәүчеләр һәм кунаклар алдында ясаган чыгышында, Актаныш районы башлыгы Энгель Фәттахов Актаныш авылы һәм район хакында җентекләп сөйләде. Муниципаль берәмлекнең казанышлары хакында сөйләгәндә, ул барлык җиңүләр һәм яхшы нәтиҗәләргә райондагы хезмәт сөючән халыкның тырышлыгы белән ирешелә, дип ассызыклады.

Энгель Фәттахов үз чыгышында районның горурлыгы булган шәхесләрне искә алып үтте. Һичшиксез, аларның иң күренеклесе – Татарстанның беренче Президенты Минтимер Шәймиев.

Район башлыгы актанышлыларны юбилей белән котлап, аларга сәламәтлек һәм яңадан-яңа уңышлар теләде.

Республика Премьер-министры Илдар Халиков Татарстан Президенты Рөстәм Миңнеханов һәм ТР Хөкүмәте исеменнән районда яшәүчеләрне тәбрикләде. “Актаныш авылы һәм районның юбилее – актанышлылар өчен генә түгел, бөтен республика өчен дә зур бәйрәм”, - дип ассызыклады ул. Илдар Халиков билгеләп үткәнчә, Актаныш районын аның бернигә дә карамастан татар халкының бөек традицияләрен саклавы һәм аларны буыннан-буынга тапшыруы да башкалардан аерып тора.

Бүген ТР Дәүләт Киңәшчесе Минтимер Шәймиев тә котлау телеграммасы юллады. Аерым алганда, анда ул хезмәт сөючәнлекләре һәм үз дигәнендә нык торулары өчен актанышлыларга рәхмәт белдерә.

Бүген актанышлылар республика җитәкчелеге исеменнән яңа автобус ачкычлары алды. Аларны район башлыгына Илдар Халиков тапшырды. Үз эшчәнлекләре өлкәсендә аеруча зур уңышка ирешкән актанышлылар дәүләт бүләкләренә лаек булды.

Үз чиратында, Энгель Фәттахов ТР Премьер-министры урынбасары – энергетика министры Илшат Фәрдиев һәм “Татнефть” ААҖ генераль директоры Шәфәгать Тәһаутдиновка “Актаныш районының мактаулы гражданины” дигән исем бирү турында карар кабул ителүе хакында хәбәр итте.