Рөстәм Миңнеханов:“XXI гасыр Казаны” торак комплексында иң заманча мәктәп кенә түгел, Белем бирү үзәге калкып чыкты”

Бүген ТР Президенты Рөстәм Миңнеханов “XXI гасыр Казаны” торак комплексында төзелгән “178 нче белем бирү үзәге”н ачты. Тантанада шулай ук ТР Президентының Социаль мәсьәләләр буенча ярдәмчесе Татьяна Ларионова, Казан мэры Илсур Метшин, ТР Мәгариф һәм фән министры Альберт Гыйльметдинов, ТР Дәүләт Советы Секретаре Лилия Маврина, Казан шәһәре Мәгариф идарәсе башлыгы Илсур Һадиуллин һәм башка рәсми затлар, укучылар һәм аларның ата-аналары катнашты.

Рөстәм Миңнеханов муниципаль белем бирү учреждениесе ачылышында: ”Бүген монда иң заманча мәктәп кенә түгел, Белем бирү үзәге калкып чыкты. РФ Президенты әйткәнчә, ул - безнең яңа мәктәп. Биредә яңа уку елы башлануга мин бик шат”, - дип белдерде. Республика башлыгы әлеге микрорайонны төзү белән шөгыльләнүче “АК БАРС групп”ка рәхмәтләрен җиткерде. “XXI гасыр Казаны” инвестиция проекты торак кына төземи, социаль инфраструктура объектларына игътибар бирә. Бу бик зур чыгымнар таләп итә. Нәтиҗәдә искиткеч йортлар, менә дигән мәктәп калкып чыкты. Балалар – безнең киләчәгебез, алар республикабызны үстерсен”, - дип, Президент, яңа уку елы башлану белән котлады. Бу мәктәптәге беренче дәрескә кыңгырауны да Рөстәм Миңнеханов яңгыратты. Ул мәктәпкә компьютер сыйныфы алу өчен сертификат тапшырды.

Казан мэры Илсур Метшин исә: “Без сезгә яңа Белем бирү үзәге бүләк итә алуыбызга шат. Мин ел саен Татарстан башкаласында яңа мәктәп, балалар бакчалары ачылу белән республика җитәкчелегенә рәхмәт әйтәсем килә. Без бүген - яңа Белем бирү үзәгендә. Ул - Татарстанда әлегә бердәнбер. Без уңышлы эшләп китәр дип ышанабыз”, - диде бәйрәм белән котлап. Һәм мәктәпнең икенче туган йортка әйләнүен теләп: “Уңышларыгыз белән ата-аналарыгызны һәм укытучыларгызны шатландырыгыз”, - диде.

Мэр шулай ук әлеге микрорайонны төзү белән шөгыльләнүче “АК БАРС групп”ка рәхмәтләрен җиткерде. “Без - хәзер “XXI гасыр Казаны” торак комплексында. Ул башкала микрорайоннарының нинди булырга тиешлеген күрсәтә”, - диде Илсур Метшин.

“АК БАРС БАНК” ачык акционерлык җәмгыяте директорлар советы рәисе, ТР Дәүләт Советы депутаты Роберт Мусин, мәктәп директоры Венера Хәйретдинова Белем көне белән котлады.

Тантаналы линейкадан соң кунаклар ТР Президенты Рөстәм Миңнеханов белән берлектә “178 нче Белем бирү үзәге” белән танышты. Укучылар һәм укытучылар белән аралашты.

“178 нче Белем бирү үзәге” кебек яңа типтагы белем бирү йортлары Мәскәү, Санкт-Петербург, Чиләбе, Самара шәһәрләрендә дистә елга якын эшләп килә. Белем бирү үзәгенә 13 060 квадрат метр мәйдан биләгән өч бина керә: Габдулла Кариев урамында 636 укучыга исәпләнгән мәктәп, Космонавтлар урамындагы 121 нче лицей һәм Камалиев урамындагы “Пеликан” балалар бакчасы.

Мәктәптәге 34 уку кабинетының барысы да интерактив такталар, мультимедияле проекторлар, акустик җиһазлар, укытучылар өчен компьютерлар белән тәэмин ителгән. Моннан тыш, укучылар белән аерым шөгыльләнү өчен, өстәмә 2-3 компьютер куелган. Химия һәм физика, биология кабинетларында цифрлы лабораторияләр өчен шартлар тудырылган. Лингвистик кабинетлар күпфункцияле “Apple” тел класслары базасында эшли.

Моннан тыш, 20 урынга исәпләнгән китапханә-медиатека, 2 бассейн, спорт һәм хореография заллары, спорт мәйданчыклары, конференц-зал, актлар залы, ашханә, табиб, процедуралар, теш табибы, психолог кабинетларын үз эченә алган медицина үзәге эшли.
“178 нче Белем бирү үзәге” чын мәгънәсендә бербөтен комплексны тәшкил итә, монда тәрбия һәм белем йортлары арасында дәвамчанлык саклана. Мәсәлән, инглиз теле балалар бакчасыннан ук өйрәтелә башлый, башлангыч сыйныфларда инглиз теле тирәнтен өйрәтелә һәм икенче чит тел (немец, француз телләре) сайлап алына. Өлкән сыйныфларда да ике чит тел үстерелә, 5-11 нче сыйныфларда икътисади белем бирелә, информацион технологияләр белән киңрәк таныштырыла, профильле укытуга өстенлек бирелә. Башлангыч сыйныфлар өчен озайтылган көн төркемнәре эшли. Балалар өч тапкыр кайнар ризык белән тәэмин ителә.

Шунысы кызыклы: 10-11 сыйныфларда укучылар физика-математика, табигый-фәнни, социаль-икътисади, гуманитар юнәлешләр буенча аерым планнар буенча шөгыльләнә алачак.

Белем бирү үзәгендә татар телендә тәрбия бирү белән шөгыльлнүче сыйныфларның эшен оештыру каралган. Бу сыйныфларда дәресләр – рус телендә, тәрбия эше татар телендә алып барылачак.

Россия Ислам университеты белән төзелгән килешү нигезендә, үзәктә гарәп һәм төрек телләре, “Диннәр тарихы” предметлары укытылачак.

Казан дәүләт технология университеты башлангычы белән, “Профессор сыйныфлары” оештыру каралган. КДТУ профессорлары җитәкчелегендә укучыларны олимпиадаларга һәм башка интеллектуаль бәйгеләргә әзерләячәкләр. “178 нче Белем бирү үзәге”ндә өстәмә белем бирү бүлеге һәм киң профильле медицина үзәге эшләячәк.