Рөстәм Миңнеханов: “Иң мөһиме - кече һәм урта бизнес базасында яңа югары технологияле производстволар барлыкка килүгә юл ачу”

“Кече бизнес. Финанслау һәм дәүләт ярдәме”. Бүген Казанда “ОПОРА РОССИИ” кече һәм урта эшмәкәрлекне үстерү гомумроссия җәмгыяте белән “ОПОРА-КРЕДИТ” медиахолдингы оештырган конференция әнә шулай атала. ТР Кече һәм урта эшмәкәрлекне үстерү агентлыгы булышлыгында уздырылучы бу чараның максаты – эшмәкәрләрне гамәлдәге дәүләт ярдәме механизмнары, аларны финанслау өчен каралган инструментлар белән якыннан таныштыру. IT–паркта видеоэлемтә режимында оештырылган конференцияне ачу тантанасында ТР Президенты Рөстәм Миңнеханов, Премьер-министрның беренче урынбасары Равил Моратов, “ОПОРА РОССИИ” президенты, Кече һәм урта эшмәкәрлекне үстерү буенча Хөкүмәт комиссиясе рәисе урынбасары Сергей Борисов һ.б. катнашты.

Президент Рөстәм Миңнеханов Татарстан башкаласында эшмәкәрлек проблемаларына багышлап уздырылучы мондый масштаблы чарага зур өметләр баглануын җиткерде. Аның белдерүенчә, бүгенге шартларда кече һәм урта бизнесның үсешен дәүләтнең административ һәм финанс ярдәменнән башка күз алдына китерү мөмкин түгел. “Республикада бүген эшмәкәрлек үсеше өчен уңайлы инфраструктура булдырылган, бу эш алга таба да дәвам итәчәк. Иң мөһиме - финанслау, кече һәм урта бизнес базасында яңа югары технологияле заманча производстволар барлыкка килүгә юл ачу”, -дип ассызыклады республика башлыгы. Президент искәртүенчә, көндәшлеккә сәләтле булу, продукцияне сату буенча базарлар яулау өчен яңа технологияләр һәм җиһазлар кирәк. Соңгы елларда республикада инновацияле бизнес үсеше өчен күп мәйданнар төзелде. “Аларның нәтиҗәлелеге, перспективасы җитди финаслар салуга, шулай ук модернизациягә бәйле”, -ди ул. Аның искәртүенчә, җитди партнерлык мөнәсәбәтләре, дәүләт программалары булу да кече һәм урта эшмәкәрлекнең үсеш перспективаларын билгеләүче төп факторлар. Бүген республикада кече һәм урта эшмәкәрләргә дәүләт ярдәме буенча төрле формалар сынала. Президент белдерүенчә, бу юнәлештә заманча проектларны гамәлгә ашыруда Татарстан алга таба да тәҗрибә мәйданы булып калачак.

Алдынгы илләрдә кече һәм урта эшмәкәрлекнең тулай төбәк продуктындагы өлеше 50-60 процентка җитә. Бүген республикада аның күләме 24 процент кына. Киләчәктә бу өлешне 30 процентка җиткерү бурычы куелган. Ил һәм республика күләмендә эшмәкәрлеккә ярдәм буенча алып барылучы дәүләт сәясәте шушы максатка да хезмәт итә. Президент кече һәм урта эшмәкәрлекнең яңа эш урыннары булдыру ягыннан да мөһим ролен ассызыклап, конференция эшендә уңышлар теләде. Эшмәкәрләрне, муниципалитетлар вәкилләрен бу җыенда активлык күрсәтергә, үзләрендәге уңай тәҗрибә белән уртаклашырга, көнүзәк проблемаларны куярга чакырды.