Татарстан һәм Федераль балыкчылык агентлыгы хезмәттәшлек турындагы килешүгә кул куйды

Бүген ТР Министрлар Кабинетында Татарстан Президенты Рөстәм Миңнеханов Федераль балыкчылык агентлыгы җитәкчесе Андрей Крайний белән очрашты.

Очрашуда Татарстан Республикасы һәм Федераль балыкчылык агентлыгы арасында “2009-2014 елларда балык хуҗалыгы комплексының ресурс потенциалын файдалану һәм үстерүдә нәтиҗәлелекне арттыру” дигән Федераль максатчан программаны гамәлгә ашыру өлкәсендә хезмәттәшлек турындагы килешү имзаланды.

Килешү нигезендә Татарстанның Балык Бистәсе районында стационар һәм йөзмә балык заводларын үз эченә алган чөгә балыгы үрчетү комплексы төзеләчәк.

Килешүгә кул куйганнан соң Андрей Крайний журналистларга яңа заводта чөгә балыгы үстереләчәге хакында сөйләде. Чөгә - төче суларда яшәүче һәм үзен җибәргән урыннан ерак (70-100 чакрымга) китми торган кыйммәтле балык.

Моннан тыш, “Алабуга” махсус икътисади зонасында Мурмански һәм Ерак Көнчыгыштан китерелүче балыкны эшкәртү производствосы төзеләчәк. Шулай ук Татарстанда “Океан” кибетләр челтәре киң җәелдерелә. Казан, Чаллы һәм Әгерҗедә кибетләр ачылган инде, тиздән алар Түбән Кама һәм Әлмәт шәһәрләрендә ачылачак.

Федераль балыкчылык агентлыгы җитәкчесе билгеләп үткәнчә, ТР җитәкчелеге балыкчылык тармагын үстерү буенча әлеге киң колачлы проектларга ярдәм күрсәтә. “Россия Федерациясенең башка күп кенә төбәкләреннән аермалы буларак, әгәр Татарстанда карар кабул ителә икән, аның үтәләчәгенә шикләнмәскә мөмкин”, - дип белдерде ул.

Беренче вице-премьер Равил Моратов ачыклык керткәнчә, федераль максатчан программа буенча балык заводлары төзелешенә акчалар инде быел ук бүленәчәк. Иң беренчеләрдән булып йөзмә балык заводы төзеләчәк, аның бәясе 300 миллион сумга якын тора. 2011 елда стационар балык заводын төзү эшләре башланып китәчәк. Аның бәясе, барлык инфраструктураны да кертеп, 650 миллион сум чамасы тәшкил итә.

Андрей Крайнийның сүзләренә караганда, йомык цикл шартларында мәрсин балыгы үрчетү заводы да төзеләчәк. Биредә елына 15-16 тонна кара уылдык җитештерү күздә тотыла. Әлеге бизнес-проектның инвестицияләр күләме 1 миллиард сумга якын тәшкил итә. Боларның барысы да яңа эш урыннары булдырачак.

Равил Моратов булачак проектларның тагын бер әһәмиятен билгеләп үтте. Балык җитештерүдән тыш, яңа производстволар туристлык үсешенә этәргеч бирәчәк. 104 мең гектар мәйданда туристлык-сәламәтләндерү паркы булдыру ниятләнә, биредә кешеләр ял итә һәм балык тота алачак.