Рөстәм Миңнеханов Дмитрий Медведевны 45 яшь тулуы белән котлады

2010 елның 14 сентябре, сишәмбе
Татарстан Президенты Рөстәм Миңнеханов Россия Президенты Дмитрий Медведев адресына 45 яшь тулуы уңаеннан котлау телеграммасы юллады.

“Хөрмәтле Дмитрий Анатольевич!

Татарстанлылар һәм шәхсән үз исемемнән Сезне ихлас күңелдән туган көнегез белән котлыйм, Сезгә һәм гаиләгезгә изге теләкләремне җиткерәм.

Бүген Сез ышанычлы һәм эзлекле рәвештә Россия Федерациясен инновацион икътисад, югары тормыш сыйфаты, дөнья мәйданындагы позицияләрне көчәйтү кебек стратегик максатларга алып барасыз. Ил алдына бүгенге тормыш куйган катлаулы бурычларны хәл итәсез, яңа алымнарны Россия традицияләренә игътибарлы мөнәсәбәт күрсәтеп оста яраштырасыз, үзегезне нык ихтыярлы, кешеләр турында кайгыртучы дәүләт лидеры буларак күрсәтәсез.

Без Сезгә Россиянең күпмилләтле халкы бәхете хакына алга таба да нәтиҗәле эшчәнлек алып бару өчен көч һәм бетмәс-төкәнмәс энергия телибез. Сезнең инициативаларны хуплыйбыз һәм дәүләтнең киң колачлы бурычларын хәл итәргә әзер торабыз”, - диелә котлау телеграммасында.
ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International