Әлмәттә капиталь ремонттан соң тимер юл вокзалы ачылды

Бүген Татарстаның Әлмәт районында истәлекле вакыйга булды. Капиталь ремонттан соң тантаналы рәвештә вокзал комплексы һәм “Әлмәт” тимер юл станциясе платформасы ачылды. Чарада Татарстан Президенты Рөстәм Миңнеханов катнашты.

“Шулай килеп чыкты инде, без Горький тимер юлының Татарстан участогы буенча күп кенә станцияләрне тәртипкә китердек, ә менә Куйбышев юнәлеше озак вакыт дәвамында күләгәдә калды. Хәзер барысы да үзгәрде, безгә бары тик Зәй станциясен генә төзекләндерәсе калды. Мин әлеге проектны тормышка ашыруга зур өлеш керткәннәре өчен Россия тимер юллары һәм Әлмәт муниципаль районы җитәкчелегенә ихлас рәхмәтләремне ирештерәм. Әлмәт районында яшәүче һәркем өчен тимер юлдан бернинди тоткарлыксыз хәрәкәт итү мөмкинлеге тудырылуына мин бик тә шат”, - дип ассызыклады Р.Миңнеханов сәламләү сүзендә.

Шуннан соң Татарстан Президенты барлык таләпләргә җавап бирүче вокзалның яңартылган бинасын шәхсән үзе тикшерде.

Куйбышев тимер юлының 1959 елда төзелгән “Әлмәт” станциясе вокзал комплексы әле быел гына шундый зур ремонт күрде. 2008 елда станцияне реконструкцияләү турында карар кабул ителә. ТР Хөкүмәте һәм Куйбышев тимер юлы – “Россия тимер юллары” ААҖнең филиалы арасында 2008-2010 елларга исәпләнгән хезмәттәшлек турында килешү имзалана, ул транспорт пассажир инфраструктурасы объектларын камилләштерү чараларын гамәлгә ашыруны күздә тота. Әлеге килешү кысаларында Ютазы һәм Лениногорски муниципаль районнарында “Урыссу” һәм “Писмән” станцияләре вокзал комплексларын яңарту эшләре башкарылган инде, 2010 елда Әлмәт станциясенә дә чират җитте, хәзер Зәй вокзалын гына төзекләндерәсе калды.

Вокзалның бер катлы бинасын һәм “Әлмәт” станциясе платформасын реконструкцияләү һәм капиталь төзекләндерүгә 23,6 миллион сум акча сарыф ителгән. Килешү нигезендә, аның 50 процентын – Әлмәт муниципаль районы, калганын “Россия тимер юллары” ААҖ бүлеп биргән.

Белешмә өчен. Вокзалның гомуми мәйданы 480 квадрат метр тәшкил итә. Платформа 1960 елда төзелгән, аның озынлыгы – 260 метр, мәйданы 728 квадрат метр. Тимер юл вокзалы аша көн саен 7 пар поезд уза.