Универсиадага бүленеп бирелгән бюджет акчаларын файдалану тәртибен тикшерү нәтиҗәләре октябрь аенда РФ Хисап палатасы һәм ТР Хисап палатасы коллегияләренең уртак утырышында каралачак

Бүген Татарстан Республикасы Президенты Рөстәм Миңнеханов Россия Федерациясе Хисап палатасы аудиторы Сергей Агапцов белән очрашты. Очрашу ТР Хөкүмәте йортында узды.

Искәртеп үтәбез, Сергей Агапцовның Казанга визиты 2013 елгы Универсиадага әзерлек барышында Хисап палатасы тарафыннан федераль бюджет субсидияләренең кулланылышын тикшерү эшләренең төгәлләнүе белән бәйле.

Рөстәм Миңнеханов 2013 елгы Универсиаданы үткәрүгә әзерлек кысаларында чараларның мөһимлеген билгеләп үтте. Әлеге вакыйга Татарстан өчен генә әһәмиятле үгел, ул илебез тарихына керәчәк, диде ТР Президенты. Ул 2013 елда Мәскәүдә Универсиада үткәрелгәнгә 40 ел булачагын искәртте.

Барлык федераль министрлык һәм ведомстволар әлеге чараларга әзерлек эшләрендә республикага ярдәм күрсәтә, диде Рөстәм Миңнеханов. Россия Президенты Дмитрий Медведев һәм Россия Хөкүмәте Рәисе Владимир Путин 2013 елгы җәйге Универсиадага әзерлек мәсьәләләренә аерым игътибар бирә.

2013 елгы Универсиаданы үткәрүгә бәйле рәвештә үзебезгә йөкләнгән җаваплылыкны без яхшы аңлыйбыз, дип белдерде Рөстәм Миңнеханов. Аның сүзләренә караганда, Россия Федерациясе Хисап палатасының эше аеруча мөһим.

Очрашуда билгеләп үтелгәнчә, 2013 елда Казанда XXVII Бөтендөнья җәйге Универсиадасын үткәрүгә әзерлек эшләренә бүленгән бюджет акчаларының кулланылышын тикшерү нәтиҗәләре 2010 елның октябрендә Россия Федерациясе Хисап палатасы һәм Татарстан Республикасы Хисап палатасы коллегияләре утырышында тикшереләчәк, дип хәбәр итә ТР Президентының матбугат хезмәте.