ТР Президенты һәм Испания илчесе алда торган “Рубин” – “Барселона” матчы хакында фикер алышты

2010 елның 29 сентябре, чәршәмбе
Татарстан Президенты Рөстәм Миңнехановның Испания Корольлегенең Россия Федерациясендәге Гадәттән тыш һәм Тулы вәкаләтле илчесе Хуан Антонио Марк Пужоль белән очрашуы алда торган “Рубин” – “Барселона” матчы хакында фикер алышудан башланды. Очрашу бүген ТР Министрлар Кабинетында узды.

Очрашуда катнашкан ТР Президентының Халыкара мәсьәләләр буенча ярдәмчесе, ТР Президентының Тышкы элемтәләр департаменты директоры Тимур Акуловның сүзләренә караганда, әле яңарак кына “Барселона” клубы җитәкчелеге белән сөйләшү төгәлләнгән. Кунакларның кәефе бик яхшы. Клуб президенты әйтүенчә, алар Казанга җиңү яуларга килгән.

“Матчта иң көчле команда җиңәргә тиеш, - диде Рөстәм Миңнеханов. – Мин дөньякүләм дәрәҗәдәге команда саналган “Барселона”ның янә Казанга килүенә шат. “Рубин”га мондый команда белән уйнавы бик катлаулы, әлбәттә. Әмма Россиянең барлык футбол сөючеләре әлеге матчны игътибар белән күзәтә”.

Марк Пужоль белдергәнчә, “Барселона” һәм “Рубин” төркемнән чыгып, Чемпионнар лигасы финалында үзара очрашса бик кызык булыр иде.

Рөстәм Миңнеханов вакыйгалар үсешенең мондый варианты белән килеште һәм: “Бүген мин тигез исәпкә дә риза”, - дип өстәде.
ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International