Татарстан медицинасында инновацион һәм мәгълүмат технологияләре тормышка ашырыла

Бүген ТР Министрлар Кабинетында видеоконференция режимында узган киңәшмәдә сәламәтлек саклау министры Айрат Фәррахов сәламәтлек саклау өлкәсендә мәгълүмат технологияләренә багышланган доклад ясады. Киңәшмәне ТР Премьер-министры Илдар Халиков алып барды.

Айрат Фәррахов сүзләренә караганда, Татарстанның Сәламәтлек саклау министрлыгы инновацион һәм мәгълүмат технологияләрен гамәлгә ашырудагы күп санлы проектлар башында тора. Бүгенге көндә министрлык тормышка ашыра торган иң эре проектларның берсе булып Диспетчер үзәге санала. Проект кысаларында Үзәк медицина сурәтләре архивы булдырыла. Архив Татарстанның медицина өлкәсендәге санлы диагностика җиһазларын берләштерә. Бүгенге көндә архивка 82 медицина аппараты тоташтырыла, базада 80 меңнән артык сурәт саклана. Хәзерге вакытта Үзәк медицина сурәтләре архивына тоташкан сәламәтлек саклау учреждениеләре даими рәвештә видеоконсультацияләр үткәрә.

Айрат Фәррахов ассызыклаганча, кичектергесез медицина ярдәме станцияләрен һәм үзәкләрне ГЛОНАСС иярчен навигациясе аппаратурасы булган заманча мәгълүмат алмашу системалары белән җиһазландырыла. 2011 елда республиканың барлык станцияләре һәм үзәкләре ЕГИС ГЛОНАСС+112 системасына тоташтырылачак.

Быел шулай ук онкологик кластерны мәгълүматлаштыру проекты тормышка ашырыла. Бу авыруларга ярдәм күрсәтә торган барлык табибларны бердәм мәгълүмат кырына тоташтырырга мөмкинлек бирә. 93 учреждениедә 600дән артык эш урыны булдырыла.

Казанның барлык балалар сырхауханәләре бердәм мәгълүмат челтәренә берләштерелгән, табибка электрон рәвештә язылу бара, регистратураларның атвоматлашкан эше тәэмин ителә. Үзләренең шәхси медицина кабинетларын порталда инде 4 мең гаилә теркәгән.
Айрат Фәррахов хәбәр иткәнчә, Түбән Кама районы сәламәтлек саклау учреждениеләрен мәгълүматлаштыру процессы бара. Проект кысаларында барлык табибларны шәхси компьютерлар белән тәэмин итү, электрон регистратура, электрон медицина картасы системасы гамәлгә кертелә.

Бүген республиканың медицина учреждениеләрендә 70 мең кеше эшли. Анда 12 мең 134 компьютер тора. Шуларның 70 проценты административ-хуҗалык идарәсе максатларында файдалана. Министр сүзләренчә, республиканың барлык медицина учреждениеләре, үзәк район хастаханәләре Интернетка чыга ала. Дәвалау процессын мәгълүматлаштыру максатыннан, өстәмә 17 мең компьютер сатып алырга кирәк, диде министр.