Татарстан һәм “Роснано” Казанда Нанотехнологияләр үзәген төзү проекты буенча оештыру документларын имзалады

Бүген Татарстан Республикасы һәм “Роснано” дәүләт корпорациясе арасында Казанда “Идея” технопаркы базасында Нанотехнологияләр үзәге төзү проекты буенча оештыру документлары пакетына кул куелды. Татарстан Республикасы ягыннан оештыру документларына “Татнефтехиминвест-холдинг” ААҖ генераль директоры Рафинат Яруллин, “Идея” инновация-җитештерү технопаркы” ААҖ директоры Сергей Юшко һәм ТР Инвестиция-венчур фонды директоры Айнур Әйделдинов, “Роснано” дәүләт корпорациясе ягыннан корпорациянең генераль директор урынбасары Андрей Свинаренко кул куйды.

ТР Хөкүмәтендә узган документлар пакетын имзалау процедурасында ТР Премьер-министры Илдар Халиков, ТР Премьер-министрының беренче урынбасары Равил Моратов катнашты.

Искәртеп узабыз, 2010 елның 31 августында Мәскәүдә Татарстан Республикасы һәм “Роснано” дәүләт корпорациясе арасында Казанда “Идея” технопаркы базасында Нанотехнологияләр үзәге төзү проекты буенча инвестицион килешү имзаланган иде. Килешүгә “Роснано” дәүләт корпорациясе нанофабүзәкләр төзү проектын сайлап алу буенча беренче ачык конкурс нәтиҗәләрен игълан иткәннән соң кул куелды. Татарстан Республикасы тарафыннан тәкъдим ителгән проект “Дубна” күп функцияле нанотехнология үзәге, Зеленоградтагы “Нано- һәм микросистема техникасы” нанофабы һәм “Сигма” мультидисциплинар нанотехнология үзәге” (Новосибирск – Томск) белән беррәттән җиңүчеләр арасына керде.

Бүген Андрей Свинаренко белән очрашу барышында ТР Премьер-министры Илдар Халиков Татарстан инициативасын хуплаганы өчен “Роснано” дәүләт корпорациясе җитәкчелегенә рәхмәт белдерде. Үз чиратында, Андрей Свинаренко билгеләп үткәнчә, Казанда “Идея” технопаркы базасында Нанотехнологияләр үзәге төзү проекты буенча эшләр график нигезендә алып барыла. Аның сүзләренә караганда, мондый үзәк республикага нанопроектлар булдыру эшләрен сизелерлек арттырырга мөмкинлек бирәчәк, дип хәбәр итә ТР Президентының матбугат хезмәте.