Рөстәм Миңнеханов Геленджикта узучы Россия-Украина төбәкара икътисади форумында катнаша

Бүген Геленджикта Россия-Украина төбәкара икътисади форумы уза. Форумда Татарстан Президенты Рөстәм Миңнеханов та катнаша.

Форумны үткәрү турындагы килешүгә Россия Президенты Дмитрий Медведевның 2010 елның язында Харьковта Украина Президенты Виктор Янукович белән очрашуы вакытында ирешелде. Алга таба форумны даими нигездә үткәрү күздә тотыла.

Беренче Россия-Украина төбәкара икътисади форумы кысаларында Россия төбәкләре һәм Украина җитәкчеләренең чик буе территориясендә сәүдә үсеше, транс чик буе су артерияләреннән бергәләп файдалану, аларның экологиясе, транспорт инфраструктурасы булдыру, инновацион үсеш проблемаларына багышланган чыгышлары планлаштырылган. Моннан тыш, 2012 елда Украинада футбол буенча Ауропа чемпионаты һәм 2014 елда Сочида узачак Олимпиадага әзерлек эшләренә бәйле тәҗрибә уртаклашу күздә тотыла.

Шулай ук берничә документка кул кую планлаштырыла. Алар арасында 2011-2015 елларга исәпләнгән төбәкара һәм чик буе хезмәттәшлеге программасы, Россия һәм Украина Сәнәгатьчеләр һәм эшкуарлар берлекләре арасында хезмәттәшлек турында беркетмә, Россиянең Краснодар крае һәм Украинаның Запорожье өлкәсе арасында хезмәттәшлек турында килешү бар.

Геленджикка сәфәр барышында Россия Президенты Дмитрий Медведевны РФ Президенты Администрациясе җитәкчесе Сергей Нарышкин, РФ Президенты ярдәмчеләре Сергей Приходько һәм Александр Абрамов, РФ төбәкләр үсеше министры Виктор Басаргин, РФ энергетика министры Сергей Шматко, РФ транспорт министры Игорь Левитин, РФ икътисади үсеш министры Эльвира Нәбиуллина, Россия чик буе хезмәте башлыгы Владимир Проничев, Федераль миграция хезмәте җитәкчесе Константин Ромодановский, Федераль таможня хезмәте башлыгы Андрей Бельянинов, Россия Федерациясе дәүләт чиген тәртипкә китерү Федераль агентлыгы җитәкчесе Дмитрий Безделов озатып йөри.

Форумда Россия төбәкләрен Башкортстан, Татарстан, Санкт-Петербург, Краснодар крае, Брянск, Воронеж, Курск, Ленинград, Липецк, Свердловск өлкәләре башлыклары тәкъдим итә.