Рөстәм Миңнеханов Миркасыйм Госмановның туганнары һәм якыннарының кайгысын уртаклашты

ТР Президенты Рөстәм Миңнеханов мәрхүм галим Миркасыйм Госмановның тормыш иптәше Салисә Госмановага кайгы уртаклашкан телеграмма юллады.

“Миркасыйм Госманов республиканың горурлыгы булган мәшһүр галимнәр сафында үз урынын алган шәхес иде. Аның татар халкы тарихына һәм мәдәниятенә кагылышлы хезмәтләре милли үзаңны торгызуга, республикада яңа гражданлык җәмгыятен төзүгә хезмәт итте. Танылган акыл иясе һәм галим, педагог һәм оештыручы Миркасыйм Госмановның арабыздан китүе Татрастанның фәнни җәмәгатьчелеген, аның тарафдарлары һәм укучыларын кайгыга салды. Бу талантлы шәхеснең якты истәлеге безнең йөрәкләрдә мәңге сакланыр”, -диелгән юллар бар ТР Президентының мәрхүмнең тормыш иптәшенә юллаган телеграммасында. Президент Салисә Госмановага бу авыр көннәрдә түземлелек, ныклык тели.