Республика яшьләр форумы Татарстан яшьләренең иң кыю идеяләрен берләштерәчәк

Алдынгы, креатив идеяләрне проектларга салган Татарстан яшьләрен үзләрен тагын бер кат сынап карый ала. Агымдагы елның 17 ноябрендә республикада узачак Яшьләр форумы менә дигән мөмкинлек бирә. Бу хакта бүген ТР Министрлар Кабинетында узган матбугат очрашуында ТР Яшьләр эшләре, спорт һәм туризм министры Рафис Борханов сөйләде.

“Әлеге форумда яшьләр уртак яисә шәхси проектларын тәкъдим итә алачак. Шуның белән алар үз сәләтен күрсәтә, потенциалын тормышка ашыра ала. Мондый чаралар шулай ук фикердәшләреңне табарга һәм дәүләт ярдәмен аларга мөмкинлек бирә”, - дип саный министр.

Яшь галимнәр һәм белгечләрнең яшьләр иҗтимагый хәрәкәте рәисе Виктор Туманин хәбәр иткәнчә, форум ноябрь аенда гына узса да, проектларны сайлап алу IT-паркта 21-22 октябрьгә билгеләнгән. Анда яшь талантлар “Яшьләр фәне һәм инновацияләр”, “Яшьләр эшмәкәрлеге”, “Мәгълүмат ташкыны – яшьләр массакүләм мәгълүмат чаралары”, “Лидерлык”, “Карьера”, “Киләчәккә старт” һәм башка юнәлешләр буенча үз проектларын тәкъдим итә алачак. Шунысын да билгеләп үтәргә кирәк: IT-паркта проектларны икътисади яктан уңышлы тормышка ашыру, максатка ирешү буенча мастер-класслар, лекцияләр уздырылачак.

Иң өметле, табыш китерергә сәләтле дип саналган проектлар Эксперт советы тарафыннан сайлап алынып, форумда күрсәтеләчәк. Рафис Борһанов фикеренчә, әлеге проектларны гамәлгә кертү яшьләр арасындагы эшсезлекне киметү юнәлешендә үз эшен эшләячәк.
Яшьләр форумы нәтиҗәләре буенча талантлар белән идарә итү системасын төзү, сәләтле яшьләр һәм проектларның бердәм банкын оештыру күз алдында тотыла.

Яшьләр форумында теләсә кем үзенең проектын тәкъдим итә ала. Моның өчен 20 октябрьгә кадәр ТР Яшьләре ресурс үзәге сайтында заявка калдырырга кирәк.

Форум кысаларында шулай ук “Кадрлар резервы” проекты командасы “Өскә!” бәйгесен уздырачак, анда катнашучылар республика министрлык һәм ведомстволарында стажировка уза алачак. Татарстанның яшь гражданнары - үз форумына, Татарстан студентлары лигасы үз җыенына әзерләнә.