Илдар Халиков: “Татарстан төрек бизнесы өчен уңайлы шартлар булдыру сәясәтенә тугры кала”

Бүген Татарстан Республикасы Премьер-министры Илдар Халиков Төркия Республикасының Россия Федерациясендәге Гадәттән тыш һәм Тулы вәкаләтле илчесе Айдын Сезгин әфәнде белән очрашты. ТР Хөкүмәте йортында узган очрашуда яклар алдагы хезмәттәшлек перспективалары хакында фикер алышты, Татарстан Республикасы һәм Төркия Республикасы арасындагы бүгенге мөнәсәбәтләрнең торышы турында фикер алышты.

Аерым алганда, Илдар Халиков бүген сәяси элемтәләрнең икътисади мөнәсәбәтләрне формалаштыруын билгеләп үтте. 2010 елның беренче яртыеллыгында Татарстан һәм Төркия арасындагы тышкы сәүдә әйләнеше 871 миллион АКШ доллары тәшкил иткән. “Алабуга” махсус икътисади зонасы территориясендә Төркия компанияләре катнашында ике эре проект гамәлгә ашырыла. Мәдәни элемтәләр дә актив үсеш кичерә - Төркия Казанда узган мөселман киносы фестивалендә катнашты.

“Төркия Республикасының Гадәттән тыш һәм Тулы вәкаләтле илчесенең бүген Казанда ачылучы “Россия Федерациясендә автокомпонентлар сәнәгать кластерын инновацион яктан үстерү стратегиясе” дигән Россия-Төркия эшлекле форумында кунак буларак катнашуы әлеге чараның статусын күтәрергә мөмкинлек бирәчәк”, - диде Илдар Халиков.

Айдын Сезгин әфәнде, үз чиратында, Төркия Республикасы Президенты исеменнән Татарстан Республикасы Президенты Рөстәм Миңнеханов өчен Төркиягә рәсми визит белән килергә чакыру кәгазе тапшырды. Ул билгеләп үткәнчә, Төркия Татарстан ягыннан визитларның саны артуга карата кызыксыну белдерә һәм Татарстан делегацияләрен һәрвакыт шатланып кабул итә.

“Без Татарстан Республикасы белән бөтен өлкәләрдә дә ике якка да файдалы мөнәсәбәтләрне үстерергә телибез”, - дип белдерде Төркия Республикасының Гадәттән тыш һәм Тулы вәкаләтле илчесе. Ул искәртеп узганча, Татарстан Республикасының Истанбулдагы вәкиллеге актив эшчәнлек алып бара, бу да ике яклы мөнәсәбәтләрнең җитди булуын ассызыклый.

Айдын Сезгинның сүзләренә караганда, Төркия ягы Төркиянең кайбер динамик үсеш кичерә торган югары технологияле компанияләренең Татарстан Республикасы икътисадына инвестиция кертүенә карата кызыксыну белдерә. Шуның белән бергә ул бу очракта җирле базар механизмнарын белү кирәклеген, иртәгесе көнгә һәм төбәк икътисадының тотрыклылыгына ышаныч булырга тиешлеген билгеләп үтте.

Очрашу барышында Төркия Республикасының Гадәттән тыш һәм Тулы вәкаләтле илчесе хәл ителеше ике якка да бәйле булган кайбер мәсьәләләргә тукталды. Бу, аерым алганда, Татарстанга Төркия авиакомпанияләренең авиарейсларын арттыруга, төрек компанияләренең төзелеш өлкәсендәге эшчәнлегенә кагыла.

Татарстан Премьер-министры Илдар Халиков белдергәнчә, Татарстан төрек бизнесы өчен уңайлы шартлар булдыру сәясәтенә тугры кала. Ул әлеге мәсьәләне Татарстан Республикасы Президенты Рөстәм Миңнеханов белән дә һәрьяктан тикшерүләрен ассызыклады.

Илдар Халиков Төркия Республикасының Гадәттән тыш һәм Тулы вәкаләтле илчесе Айдын Сезгинның Татарстанга визиты кысаларында республика икътисады һәм аның сәнәгый потенциалы белән танышып кына калмыйча, Казан Кремлендә, тарихи һәм архитектура объектларында булачагына, Татарстан министрлыклары вәкилләре белән очрашачагына ышаныч белдерде. Бу хакта ТР Хөкүмәтенең рәсми порталында хәбәр ителә.