Татарстан һәм Литва арасындагы хезмәттәшлеккә иң якын юл – спорт һәм мәдәниятне үстерү, дип саный Илдар Халиков

Татарстан вәкилләре 2011-2012 елларда Балтия баскетбол лигасы ярышларында катнаша алачак. Бүген Литваның экс-премьеры Казимира Дануте Прунскене Татарстан Хөкүмәте башлыгы Илдар Халиков белән очрашуда әнә шундый тәкъдим ясады. Очрашу Татарстан Республикасы Хөкүмәте йортында узды.

Литва Республикасы экс-премьеры, Литва халык берлеге партиясе лидеры Казимира Прунскене Казанга ике көнлек эш сәфәре белән килгән иде. Кичә Казимира Прунскене һәм аны озатып йөрүче затлар ТР Авыл хуҗалыгы һәм азык-төлек министрлыгында булды, биредә ТР авыл хуҗалыгы һәм азык-төлек министры Марат Әхмәтов белән эшкәртү сәнәгате, азык-төлек өлкәсендәге хезмәттәшлекнең ихтимал перспективалары хакында фикер алыштылар.

Бүген Татарстан Премьер-министры Илдар Халиков, кунакны сәламләп, аның исемен һәм эшчәнлеген Татарстанда һәм Казанда әле дә булса хәтерлиләр, дип билгеләп үтте. Ул Казанга визит барышында Прунскене ханымның Татарстан башкаласындагы истәлекле урыннар белән таныша алачагына, алга таба гамәлгә ашырылуы мөмкин булган проектлар буенча очрашулар һәм сөйләшүләр үткәрәчәгенә ышаныч белдерде.

Илдар Халиков Татарстан икътисадына кыскача характеристика бирде, нефть химиясе һәм нефть эшкәртү тармагындагы планнар хакында сөйләде, 2013 елда Казанда Универсиада үткәрүгә әзерлек эшләре, шулай ук республикада гамәлгә ашырыла торган “ТР электрон Хөкүмәте” һәм “Электрон Татарстан” проектлары хакында хәбәр итте. Ул Татарстан Президенты Рөстәм Миңнеханов инициативасы белән “Электрон мәктәп” проектына старт бирелүен, аның кысаларында республикадагы барлык укытучыларга да ноутбуклар тапшырылуын искәртте.

Үз чиратында, Казимира Прунскене үз иле икътисады хакында җентекләп сөйләде, икътисадның структурасы Татарстанныкыннан аерылып торуын билгеләп үтте. Казимира Прунскене сүзләренә караганда, Литвада авыл хуҗалыгы, эшкәртү сәнәгате, җитен производствосы, шулай ук традицион һөнәрчелек һәм авыл туризмы нык үсеш алган.

ТР Премьер-министры Илдар Халиков Татарстан командаларының Балтия баскетбол лигасы ярышларында катнашуы турындагы тәкъдимне кабул итте. “Без чакыруны көтеп калачакбыз”, - диде ул. ТР Хөкүмәте башлыгы Татарстан мәдәнияте һәм гореф-гадәтләре белән якыннанрак танышу өчен Литва Республикасы делегациясен Сабантуй бәйрәменә чакырды. “Хезмәттәшлеккә иң якын юл – мәдәният һәм спорт өлкәсендәге элемтәләрне үстерү”, - диде Илдар Халиков.