Финляндия Президенты Тарья Халонен Казан Кремле белән танышты

Бүген Финляндия Президенты Тарья Халонен Казан Кремле белән танышты. Аны Татарстан Президенты Рөстәм Миңнеханов озатып йөрде. Алар Кол Шәриф мәчетендә һәм Благовещение соборында булды.

Кол Шәриф мәчетендә Финляндия башлыгы Аллаһ йортының Коръәннең төрле телләрдәге бүләк басмалары саклана торган гыйбадәт бүлмәсендә булды. Мәчетнең имам-хатыйбы Рамил хәзрәт Юныс кунакка мәчеткә фин татарлары бүләк иткән фин телендәге Коръәнне күрсәтте.

Тарья Халонен, үз чиратында, татарларның Финляндиягә XIX гасырда килүен билгеләп үтте. “Бездә татарлар яхшы яши, дөрес, өйләнер өчен Казанга киләләр”, - диде ул елмаеп. Финляндия һәм Татарстан Президентлары шулай ук мәчетнең аскы катында урнашкан ислам мәдәнияте музеенда да булды.

Кунакны озатканда, Рамил хәзрәт Финляндия башлыгына Кол Шәриф мәчете сурәтләнгән декоратив тәлинкә рәвешендәге сувенир, ә аның хәләл җефете Пентти Араярвига түбәтәй бүләк итте.

Благовещение соборында кунакларны Казан һәм Татарстан архиепискобы Анастасий каршы алды. Ул Татарстанның парвославие динен тотучылар һәм мөселманнар, шулай ук башка дин һәм конфессия вәкилләре дус-тату яши торган толерант республика булуын билгеләп үтте.

Казан епархиясе башлыгы Тарья Халоненны Благовещение соборы белән таныштырганнан соң, аңа Казан Изге ана иконасы миниатюрасын, ә иренә “Казан епархиясе монастырьлары” дигән альбом бүләк итте.

Искәртеп узабыз, бүген Финляндия Президенты Тарья Халонен Казанга Россия Федерациясенә визиты кысаларында килде.