Равил Моратов: “Торак-коммуналь хуҗалыгы тарифларын тикшерүләр бер районны да читләтеп үтмәячәк”

Торак-коммуналь хуҗалыгы хезмәтләренә тарифлар формалаштыруда аудиторлык тикшерүләре бер муниципаль районны да читләтеп үтмәячәк. Бүген Татарстан Премьер-министры вазифаларын башкаручы Равил Моратов ТР Министрлар Кабинетында узган киңәшмәдә (анда кайбер районнарда үткәрелгән тикшерүләргә нәтиҗәләр ясалды) әнә шулай дип ышандырды.
“Тикшерү нәтиҗәләре буенча бер генә үрнәк район да ачыкланмады, - диде Равил Моратов. – Тарифларны формалаштыручыларның аппетиты чамадан тыш зур”.
Бүген Баулы районындагы торак-коммуналь хуҗалыгы тарифларына бәйле вәзгыять Равил Моратовта аеруча зур канәгатьсезлек хисе уятты. Биредә җылылыкның бер гигакалориясе 1400 сум тора, 2011 елда тарифлар тагын 18 процентка артыр дип көтелә. Өстәвенә, районда җылылык челтәрләре ремонтланган, ә котельныйларга заманча җиһазлар урнаштырылган.
“Сез яңа җылылык челтәрләре һәм заманча котельныйлар белән тарифларны 2 мең сумга кадәр арттырырга җыенасызмы? – дип мөрәҗәгать итте Равил Моратов район җитәкчеләренә. – Бу торак-коммуналь хуҗалыгын модернизацияләү идеясенең дәрәҗәсен төшерү дигән сүз. Без моны тарифларны арттыру өчен түгел, ә янга калдыру өчен эшлибез бит”.
Шул ук вакытта, Татарстан Премьер-министры вазифаларын башкаручы Равил Моратов фикеренчә, тарифлар үсешен акрынайту һәм хәтта аларны киметү өчен резервлар бар. Мисал өчен, Р.Моратовның сүзләренә караганда, Кама Аланында җылылык белән тәэмин итү системасына реконструкция үткәрелгәннән соң җылылык өчен тарифлар 40 процентка кимегән.
Равил Моратов торак фонды белән идарә итү өлкәсендә көндәшлеккә сәләтле мохит булдыру кирәклеген билгеләп үтте. “Районда бер генә түгел, ә 2-3 идарәче компания булырга тиеш”, - дип ассызыклады ул.
Шуның белән бергә, Татарстан Премьер-министры вазифаларын башкаручы фикеренчә, идарәче компанияләр санын ишәйтү чыгымнарның артуына китермәячәк. “Бездә мондый яхшы тәҗрибә бар: идарәче компания бер генә күпфатирлы йортка хезмәт күрсәтә һәм тарифлар да артык югары түгел, - дип ассызыклады Равил Моратов. – Бары тик штатны арттырмаска, машина йөртүче, сәркатип, тагын ниндидер аңлашылмый торган кешеләр тотмаска гына кирәк”.
Татарстан Премьер-министры вазифаларын башкаручы якын көннәрдә торак фонды белән идарә итүнең күпме торырга тиешлеге турында стандартлар эшләргә вәгъдә итте.
Равил Моратов йортларны инженер челтәрләренә рөхсәтсез тоташтыру очракларын тикшерергә күрсәтмә бирде, бу, кагыйдә буларак, гомумйорт ихтыяҗларына чыгымнарның артуына китерә.
“Без бу эшне дәвам итәчәкбез һәм ачыкланган җитешсезлекләргә зур таләпчәнлек белән якын киләчәкбез, - дип ышандырды Татарстан Премьер-министры вазифаларын башкаручы. – Сайлаулар узды, без район башлыкларына кагылмадык, әмма хәзер һәр муниципаль берәмлеккә барып җитәчәкбез”.