Ауропада иң эреләрдән саналган инвестиция банкы Татарстанга үз хезмәтләрен тәкъдим итте

Ауропада иң эреләрдән саналган «Credit Suisse» инвестиция банкы Татарстан компанияләренә кайбер финанс хезмәтләре күрсәтергә мөмкин. Бүген республика Президентының банк вәкилләре белән очрашуында сүз әнә шул хакта барды.
Казан Кремлендә узган очрашуда «Credit Suisse» банкының Ауропа, Якын Көнчыгыш һәм Африка төбәкләрендәге җитәкчесе Фәүзи Кириакос-Саад, «Credit Suisse» (Казакъстан) идарәче директоры Антанас Петросиус, «Credit Suisse Russia» вице-президенты Макс Кушнер, Татарстан ягыннан ТР вице-премьеры – энергетика министры Илшат Фәрдиев, республика икътисад министры Мидхәт Шаһиәхмәтов, “ТАИФ” ААҖ генераль директоры Альберт Шиһабетдинов, “Ак Барс” банкы директорлар советы рәисе Роберт Мусин, “Связьинвестнефтехим” ААҖ генераль директоры Валерий Сорокин катнашты.
Фәүзи Кириакос-Саад хәбәр иткәнчә, «Credit Suisse» банкының эшчәнлек даирәсе түбәндәгеләр: инвестбанкинг, шәхси банкинг һәм активлар белән идарә итү. Компания штатында 49 меңнән артык хезмәткәр исәпләнә.
Банкның баланс активлары 2010 елның 1 гыйнварына – 1 триллион доллар, идарә итүдәге активлары – 1,2 триллион доллар, капиталы – 36,3 миллиард доллар, базар капиталы 59,9 миллиард доллар тәшкил иткән.
«Credit Suisse Russia» вице-президенты Макс Кушнер компаниянең Россиядә 1991 елдан бирле эшләвен хәбәр итте. Аның төп продуктлары – инвестицияләр җәлеп итү (шул исәптән, акцияләр базарында да), облигацияләр урнаштыру һәм башкалар. М.Кушнер билгеләп үткәнчә, соңгы ике елда «Credit Suisse» Татарстан банкларының (икесе – “Ак Барс” банкы, берсе – “Татфондбанк” белән) облигацияләрен урнаштыру буенча өч килешү төзегән.
«Credit Suisse» банкының эшче төркеме шулай ук октябрь азагында “ТАИФ” компанияләр төркеме заводларында (“Казаноргсинтез”, “Түбән Кама Нефтехим” һәм “ТАИФ-НК”) булды. Хәзерге вакытта “ТАИФ”ның инвестиция проектларын гамәлгә ашыру өчен «Credit Suisse» банкының үз акчаларын җәлеп итү мәсьәләсе карала.
«Credit Suisse» банкы вәкилләренең сүзләренә караганда, компания Татарстан белән яхшы таныш һәм хезмәтләрнең барлык спектрын тәкъдим итүгә карата кызыксыну белдерә. Мисал өчен, банк “Связьинвестнефтехим” ААҖ өчен финанслар җәлеп итүне оештырырга, компаниянең профильсез активларын сату һәм яңаларын сатып алу буенча консультация бирергә әзер. «Credit Suisse» банкы “Татнефть” ААҖнә дә шундый ук хезмәтләрне күрсәтергә тәкъдим итте.
Очрашу барышында яклар «Credit Suisse» банкы һәм Татарстан предприятиеләре арасында тәкъдим ителгән хезмәттәшлек вариантларын җентекләп карау турында килеште.