ТР Президенты: “Безнең бурыч – кешеләргә өстәмә эш урыннары бирү”

Бүген Мәскәүдә Кече һәм урта эшмәкәрлекне үстерү буенча Хөкүмәт комиссиясе утырышы узды. Очрашуда катнашучылар элек көн үзәгенә куелган мәсьәләләрнең беренчесен, “Патент нигезендә салым салу системасын камилләштерү турындагы федераль закон проекты”на багышланганы буенча гына фикерләште.

Утырышта РФ икътисади үсеш министры Эльвира Нәбиуллина, РФ авыл хуҗалыгы министры Елена Скрынник, статс-секретарь – РФ финанслар министры урынбасары Сергей Шаталов, Сәүдә–сәнәгать палатасы президенты Евгений Примаков, РФ Саклык банкының акционер коммерцияле идарәсе рәисе Герман Греф һәм башкалар катнашты.

Утырышны РФ Хөкүмәте Рәисенең беренче урынбасары Игорь Шувалов алып барды. Анда Татарстан Республикасы Президенты Рөстәм Миңнеханов катнашты.

РФ финанслар министры урынбасары Сергей Шаталов законның әзер проекты турында сөйләде. Законда эшмәкәрлек эшчәнлегенең 46 төре күрсәтелгән, аларның яртысыннан күбесе мәҗбүри салым салуга туры килә, ә калганнары “факультативлылар”, - дип белдерде Сергей Шаталов.

Әзерләнгән законда салым түләү чорында яллап эшләтелгән эшчеләр саны 5 кешедән артмаска тиеш. Утырышта катнашучыларның күбесе билгеләп үткәнчә, бу законның төп бурычы – ил буенча эш урыннары санын арттыру, шуңа күрә аларның санын 10 яки 15 кә кадәр арттырырга кирәк. Бу мәсьәлә буенча Финанслар министрлыгы һәм РФ Икътисади үсеш министрлыгының фикерләре туры килмәде. Эш урыннарын 10 га кадәр арттырырга кирәк, дип саный Эльвира Нәбиуллина. Герман Греф 15 кешедән арттырмау бурычы куеп, ялланган эшчеләрне җәлеп итү мәсьәләсен хәл итүне субъектларның үзләренә тапшырырга кирәк дип тәкъдим итте.

“Безнең бурыч – кешеләргә өстәмә эш урыннары бирү. Безгә эшмәкәрләргә стимул бирергә кирәк, шуңа күрә хезмәткәрләр санын 15кә кадәр арттырырга кирәк. Мисал өчен, шәхси хуҗалыклар гаилә фермаларына әйләнсен өчен”, - диде Татарстан Президенты. Шулай ук Рөстәм Миңнеханов төбәкләргә фикер алыша торган исемлеккә өстәмә эшчәнлек төрләрен кертү вәкаләтен бирергә тәкъдим итте.

Игорь Шувалов утырышка нәтиҗә ясап, эш урыннары санын чыннан да уннан унбишкә кадәр арттырырга кирәк, дип белдерде. “5 кеше дигән фикер белән мин риза түгел, - дип өстәде ул. – Безнең илдә кече һәм урта бизнеска ярдәм итәргә кирәк. Аннары кешеләр бу законга зур өметләр баглый. Без бу өметләрне акларга тиеш”. Эшчәнлекнең барлык төрләре дә Россиянең барлык субъектлары өчен дә мәҗбүри, – дип билгеләп үтте Игорь Шувалов.

Ул законны эшләп бетерүгә 10 көн бирде. Ул 26 ноябрьдә РФ Хөкүмәтенә тапшырылачак.