Ольга Голодец һәм Илдар Халиков Казан халыкара мәктәбендә булдылар
Бүген РФ Хөкүмәте Рәисе урынбасары Ольга Голодец 1 сентябрьдә ачылган International School of Kazan – Татарстан башкаласындагы беренче халыкара мәктәптә булды. Аны Татарстан Премьер-министры Илдар Халиков озата йөрде.
2014 елдан бирле Казанда эшли торган беренче ике кластер кече мәктәп булып, анда 1-4 нче класс балалары укый. 2016 елдан 5-8 нче класс укучыларына да халыкара дәрәҗәдәге белем алу мөмкинлеге булды. Биредә республикага эшкә чакырылган белгечләрнең балалары белем ала.
“450 укучыга исәпләнгән бина 26 мең кв.м гомуми мәйдан били. Биредә бер үк вакытта берничә мәгариф моделе гамәлдә була ала”, - дип аңлатты мәктәп директоры Нияз Гафиятуллин. Рус теленнән тыш, предметларның күп өлеше инглиз телендә укытыла. Балаларга белем бирү өчен АКШ, Бөекбритания, Канада, Көньяк Африкадан 30дан артык педагог чакырып китерелгән.
“Белем бирү процессын мөмкин кадәр ачык һәм уңайлы итәргә омтылабыз”, - дип билгеләп үтте Нияз Гафиятуллин. Мәктәп эчендә тоташ ябык стеналар бик аз. Нигездә, - ныклы пыяла белән бүленгән. Бу психикага басым ясый торган ябык пространстволар булмасын өчен махсус эшләнгән. Уңайлы уку бүлмәләре, ике бассейн, зур гына спорт залы һәм урамда спорт мәйданчыгы бар.
“Төрле илләрдә һәм барлык климатик зоналарда да диярлек актив шөгыльләргә комбинацияле якын киләләр: бүлмә – урам. Монда спорт белән шөгыльләнү мөмкин кадәр уңайлы булсын дип эшләнгән”, - дип сүзгә кушылды ТР Премьер-министры Илдар Халиков.
Биредәге мөмкинлекләрне карап йөргән Ольга Голодец, балаларның мәҗбүри укырга тиешле дәресләрдән кала, ә алар биредә федераль программа буенча үткәрелсәләр дә, иркен формада уза, укытучы һәрбер укучыга аерым да игътибар бирә ала, ә уку материалын кабул итү югарырак була, дип сөйләде. Биредә балалар иҗат белән шөгыльләнә: техник тәҗрибәләр дә үткәрә, театрда да уйный ала. Олга Голодец һәм аны озата баручылар шушы вакытта сәхнәсе булган атриумга килеп чыкты.
“Мәктәптә сезгә иң ошаган урын кайсы?” – дип кызыксынды РФ Хөкүмәте башлыгы урынбасары анда булган балалардан. Җавап көткәнчә һәм бердәм булды: атриум. Биредә кышкы бакча да, чәчәкләр дә, буа да, театр да бар. Ә менә кайсы предметка өстенлек бирүләре турында фикерләр аерылды: математика, физика, химия, робот техникасы, әдәбият. “Шуның кадәр күп фән аталуы куандыра. Димәк, чыннан да, кызыклы итеп укытабыз, һәм укытучыларның барысы да лаеклылар”, - дип нәтиҗә чыгарды мәктәп директоры.
Казан халыкара мәктәбендә Ольга Голодецны озата йөрүчеләр арасында шулай ук РФ финанслар министры урынбасары Айрат Фәррахов һәм ТР Премьер-министры урынбасары – фән һәм мәгариф министры Энгель Фәттахов бар иде.