Татарстанда 2676 ветеран торакка субсидия белән тәэмин ителмәгән

Бүген Татарстан Президенты Рөстәм Миңнеханов Татарстанда яшәүче Бөек Ватан сугышы ветераннарын үз вакытында һәм сыйфатлы торак белән тәэмин итә алмаучыларны тәнкыйть утына тотты.

Видеоконференция режимында торак төзү һәм файдалануга тапшыру мәсьәләләренә багышлап үткәрелгән киңәшмәдә шундый фактлар Татарстанның Әгерҗе һәм Аксубай районнарында, шулай ук Казанда ачыкланды.

“Тулаем алганда гаять зур эш башкарылды, аны дәвам итәргә кирәк. Вазифаи затларның үз эшенә салкын каравы аркасында барлык ветераннарның да үз вакытында сыйфатлы торак белән тәэмин ителмәвенә бәйле фактларның булуы кызганыч, әлбәттә”, - дип ассызыклады Президент.

Аның сүзләренә караганда, бу Әгерҗе, Аксубай районнары һәм Казан шәһәренә кагыла.

“Эш сыйатсыз башкарылган очракта исемлек тагын да озынаерга мөмкин. Барысы да тиешле җәзасын алачак”, - дип белдерде Рөстәм Миңнеханов. Аның фикеренчә, эшләнеп бетмәгән йортка бәя бирү өчен контрольлек итүче органнарны түгел, ветераннарны чакырулары аңлашылмый.

ТР Президенты Аппараты җитәкчесе Юрий Камалтынов журналистларга түбәндәгеләрне җиткерде. “Ветераннарны һәм башка категориягә кергән гражданнарны үз вакытында торак белән тәэмин итмәгән Әгерҗе муниципаль районы башлыгы адресына хат юлланды. Хатта әйтелгәнчә, шундый хәл кабатланган, Президент күрсәтмәсен үтәмәгән очракта, ул гамәлдәге законнар нигезендә вазифасыннан читләштерелергә яки аны отставкага җибәрү турында процедура башланырга мөмкин”, - дип хәбәр итте Ю.Камалтынов.

Аның сүзләренә караганда, баштарак Аксубай районы башлыгына карата да шундый чаралар күрү күздә тотылган булган, әмма вәзгыятьне җентекләп өйрәнгәннән соң биредә, беренче чиратта, башкарма комитет җитәкчесенең гаепле булуы ачыкланган. “Аңа район башлыгы тарафыннан җәза бирелгән инде, хәзерге вакытта дәүләт инвестиция-төзелеш идарәсе шундый эшкә юл куйган подрядчыларга карата тиешле чаралар күрә. Президент видеоконференциядә Аксубай районы башлыгына кисәтү ясады”, - диде Ю.Камалтынов.

Моннан тыш, “Дәүләт торак фонды” коммерцияле булмаган оешмасының попечительләр советы карары нигезендә, Дәүләт торак фонды башлыгы Тәлгать Абдуллинга шелтә белдерелде.

“Казанга килгәндә, кичә шәһәр административ комиссиясе узды, Идел буе һәм Вахитов районнары башлыгына җәза бирелде. Моннан тыш, без бүген Казан мэры адресына хат җибәрдек”, - дип белдерде Ю.Камалтынов.

“Вакытында өлгерергә кирәк, сыйфат та тиешле дәрәҗәдә булырга тиеш”, - дип сүзен йомгаклады ТР Президенты Аппараты җитәкчесе.