Новосибирски өлкәсе губернаторына Татарстанның алдынгы технологияләрен тәкъдим иттеләр

Бүген Казанга эш сәфәре белән килгән Новосибирски өлкәсе губернаторы Василий Юрченко Татарстанның социаль-икътисади үсешендәге иң эре проектлар белән танышты. Новосибирски өлкәсе делегациясе Универсиада авылында, IT-паркта, Казан федераль университетында һәм "Химград" технополисында булды. Василий Юрченконы Татарстан Президенты Рөстәм Миңнеханов озатып йөрде.
Делегация әгъзалары беренчеләрдән булып “Санкт-Петербург” волейбол сарае белән танышты. Василий Юрченко биредәге шартларга югары бәя бирде. Монда ир-егетләр һәм хатын-кызлар арасында Россия чемпионнары – “Зенит-Казан” һәм “Динамо-Казан” клублары волейболчылары шөгыльләнә һәм волейбол матчлары уза.

Универсиада авылында кунаклар Казан федераль университеты студентлары яши торган бүлмәләрне карады. Василий Юрченко Рөстәм Миңнехановтан студентлар кампусының бер квадрат метрын төзү эшләре күпмегә төшүе белән кызыксынды. Татарстан Президенты барлык инфраструктура һәм бизәкләү эшләрен исәпкә алып, Универсиада авылында бер квадрат метрның 32 мең сум торуы хакында хәбәр итте.

“Буревестник” бассейнында Василий Юрченкога Идел буе физкультура, спорт һәм туризм академиясе тәкъдим ителде. Академия ректоры Йосыф Якуповның сүзләренә караганда, тәүге 200 студент биредә 2011 елның 1 сентябрендә үк укый башлаячак.

IT-паркта аның директоры Динар Насыйров Василий Юрченкога югары технологияләр өлкәсендәге технопаркны, электрон документлар әйләнеше системасын, электрон рәвештәге дәүләт хезмәтләрен тәкъдим итте. “Идея” технопаркы хакында аның генераль директоры Сергей Юшко сөйләде. ТР Дәүләт заказы агентлыгы башлыгы Яков Геллер электрон сатып алулар системасын һәм Татарстанның электрон сәүдә мәйданчыгын тәкъдим итте.

Новосибирски өлкәсе делегациясе IT-паркның бизнес-инкубаторында да булды. Василий Юрченко бизнес-инкубатор диварында аның резидентларына уңышлар теләп язма калдырды.

Казан федераль университетында кунаклар КФУ музеенда һәм Владимир Ленин укыган тарихи аудиториядә булды. КФУ ректоры Илшат Гафуров Василий Юрченкога югары уку йорты һәм аның үсеш перспективалары хакында сөйләде.

“Химград” технополисында "Татнефтехиминвестхолдинг" ААҖ генераль директоры Рафинат Яруллин нефть химиясе өлкәсендә гамәлгә ашырыла торган проектлар хакында сөйләде. Биредә Новосибирски өлкәсеннән килгән кунаклар энергияне нәтиҗәле сарыф итүче йортны карады, технопарк резидентларының җитештерү мәйданчыкларында булды.

Татарстан Президенты Рөстәм Миңнеханов Василий Юрченкога республикада гамәлгә ашырыла торган “Лизинг-грант” программасы хакында сөйләде. ТР башлыгы билгеләп үткәнчә, программа кысаларында дәүләт эшкуарлар сатып ала торган җиһаз бәясенең 40 процентка якынын субсидияли. ТР Президентының сүзләренә караганда, 2011 елда программада авыл хуҗалыгы һәм полимерлар эшкәртүгә өстенлек бирелә.

Бүген ТР Хөкүмәте йортында Рөстәм Миңнеханов Василий Юрченко белән очраша. Иртәгә Новосибирски өлкәсе делегациясе эш программасын Татарстанның Кама аръягы зонасында дәвам итәчәк.