Бүген башкалада 388 фатирга исәпләнгән һәм гомуми мәйданы 24 мең кв. метр булган 3 торак йорт файдалануга тапшырылмаган килеш кала
Татарстанда торакны сафка бастыру буенча еллык бирем әлегә 40 процентка үтәлгән, ягъни 970 мең кв. метр мәйданда торак сафка бастырылган. Июнь аенда республикада 200 мең кв метр мәйданны сафка бастыру бурычы куела. Әлеге мәгълүматлар бүген ТР Хөкүмәт йортында видеоконференция рәвешендә узган республика киңәшмәсендә яңгырады. Торак төзелеше, Бөек Ватан сугышы ветераннарын торак белән тәэмин итү, гражданнарны авария хәлендәге тораклардан күчерү мәсьәләләренә багышланган киңәшмә ТР Президенты Рөстәм Миңнеханов һәм Премьер-министр Илдар Халиков рәислегендә узды.
Төзелеш, архитектура һәм торак-коммуналь хуҗалык министры Ирек Фәйзуллин сүзләренә караганда, еллык биремне һәм бер кешегә туры килгән торакны сафка бастыру планын үтәү буенча Буа, Әгерҗе, Апас, Тәтеш, Биектау, Тукай, Лаеш, Питрәч районнары югары нәтиҗәләр бирә. Аларда узган 5 ай эчендә еллык программаның 80 проценттан артыграгы инде үтәлгән. Шул ук вакытта Чүпрәле, Мамадыш, Менделеев районнарында бу күрсәткеч республика буенча уртача күрсәткечтән дә түбәнрәк. Социаль ипотека программасы буенча, гомуми мәйданы 237 мең кв. метр булган 105 йорт файдалануга тапшырылган. Еллык план шул рәвешле 40 процентка үтәлгән.
Июнь аенда республикада Дәүләт торак фонды программасы буенча 398 фатирга исәпләнгән һәм гомуми мәйданы 26,8 мең кв. метр булган 9 торак йорт төзелешен тәмамлап, сафка бастыру ниятләнә. Киңәшмәдә ассызыклап үтелгәнчә, объектларның күбесе Әгерҗе, Әлки, Әлмәт, Чүпрәле, Алабуга һәм Минзәлә районнарында урнашкан. Алабуга муниципаль районындагы торакның вакытында өлгермәү куркынычы бар. Ике атна элек узган киңәшмәдә биредәге производство эшләренең графиктан калышуы билгеләп үтелгән иде. Шушы узган ике атна эчендә бернинди үзгәреш булмаган. Шулай да район җитәкчелеге объектны 26 июньгә өлгертергә ышандыра.
Киңәшмәдә Казан шәһәрендә быел сафка бастырылырга тиешле тораклардагы кайбер проблемалар күтәрелде. Бүген башкалада 388 фатирга исәпләнгән һәм гомуми мәйданы 24 мең кв. метр булган булган 3 торак йорт файдалануга тапшырылмаган килеш кала. Алар Азино-1, “Кояшлы шәһәр” микрорайоннарында һәм Габишев урамында урнашкан. Эшне тоткарлаучы төп сәбәп – тирә-юнендә төзекләндерү эшләренең тәмамланмавы. Өстәвенә, ТР Дәүләт төзелеш күзәтчелеге инспекциясе күрсәткән кимчелекләрне бетерәсе бар. Инде файдалануга тапшырылып, фатир хуҗаларына ачкычлар бирелгән 6 йортта да эшләр бетмәгән икән әле. Азино-1 микрорайонындагы, 6-3,6-4 йортлары, Минская урамындагы өч йорт, Мало-Московская урамындагы бер йорт инде май аенда ук файдалануга тапшырылган булуга карамастан, биредә әлегә кадәр ТР Дәүләт төзелеш күзәтчелеге инспекциясе тапкан кимчелекләрне төзәтү эше дәвам итә.
ТР Дәүләт торак фонды быел 2011 елда файдалануга тапшырыласы йортларның техник әзерлеген тикшергән иде. Ел тәмамланырга 6 айдан азрак вакыт калуга карамастан, 14 объектның техник әзерлеге 20 проценттан да ким. Бүгенге киңәшмәдә муниципаль районнар башлыклары алдына ТР Дәүләт торак фонды белән берлектә бу мәсьәләгә якын арада чишелеш эзләү бурычы куелды.
Бөек Ватан сугышы ветераннарын тораклар белән тәэмин итүгә килгәндә, фатир алу турында килешүләр төзеп, исәп-хисап ясаган 327 ветеран әлегә торак шартларын яхшыртмаган. Июнь аенда федераль үзәктән республикага ветераннарны тораклы итү өчен өстәмә рәвештә 803 млн. сумлык субсидияләр алынган. Ул 851 ветеранны тораклы итәргә ярдәм итәчәк.
Быел 9 майдан соң гомуми мәйданы 18 мең кв. метр булган 60 йортны файдалануга тапшыру ниятләнә. Ул 269 ветеранны тораклы итәргә булышачак. Бүгенгә ветераннар өчен гомуми мәйданы 500 кв. метр булган 9 шәхси йорт файдалануга тапшырылган. 416 фатирга исәпләнгән 51 торак йортта хәзергә төзелеш алып барыла.
Президент Рөстәм Миңнеханов барлык ветераннарның да торак шартларын яхшырту өчен субсидия алуга мөмкинлеген тәэмин итүгә тагын бер кат игътибар юнәлтте. Аның ассызыклавынча, ветераннар барлык уңайлыклары һәм сыйфатлы булган торакларга урнашырга тиеш.