“Булгария” баткан урында тикшерү эшләре дәвам итә һәм судноны күтәрүгә әзерлек бара

“Булгария” баткан урында тикшерү эшләре дәвам итә һәм судноны күтәрүгә әзерлек бара. Бу хакта бүген фаҗига сәбәпләрен тикшерү буенча Хөкүмәт комиссиясе утырышында белдерелде. ТР Хөкүмәт йортында узган утырышта Татарстан Премьер-министры Илдар Халиков катнашты.
Россия гражданнар оборонасы эшләре, гадәттән тыш хәлләр һәм бәла-каза нәтиҗәләрен бетерү министры урынбасары Александр Чуприян белдерүенчә, 13 июльнең 17.00 сәгатеннән алып бүгенге көннең 9.00 сәгатенә кадәр водолазлар суднога 94 тапкыр төшкән, 4 кешенең мәете табылган. Водолазлар эзләү операциясе башыннан алып барлыгы 439 тапкыр суднога төшкән. “Булгария” теплоходы һәлакәте фаҗигасендә гомере өзелүчеләрнең 105 мәете табылган.
Һәлакәт урынында Россия Гражданнар оборонасы эшләре, гадәттән тыш хәлләр һәм бәла-каза нәтиҗәләрен бетерү министрлыгыннан 1144 кеше һәм 188 техника эшли, коткаручылар Идел акваториясендә һәлак булучыларның мәетен эзләүне дәвам итә.
Шулай ук һәлакәт урынында судноны күтәрүгә әзерлек бара. Россия Гражданнар оборонасы эшләре, гадәттән тыш хәлләр һәм бәла-каза нәтиҗәләрен бетерү министрлыгы 40нчы институтының водолазлары баткан теплоходны тикшерү өчен 13 тапкыр су төбенә төште һәм “Булгария”не күтәрүгә әзерли башладылар.
Бүгенге мәгълүматлар буенча Татарстанда һәм Россиянең башка төбәкләрендә 81 кеше җирләнгән, диде Татарстан Премьер-министры Илдар Халиков. Зыян күрүчеләргә паспортлар һәм документлар бирү оештырылган. И.Халиков сүзләренә караганда, Россия миграция хезмәте идарәсе кыска вакыт эчендэ документларны әзерли, 13 татарстанлыга паспорт һәм Россиянең башка төбәкләрендә яшәүчеләргә вакытлы документлар бирелгән.
Бу фаҗигада һәлак булучыларның гаиләләренә компенсацияләр түләнә башлады. Татарстан Премьер-министры мүгълүматларына караганда, Татарстан Республикасы бюджетыннан 300 мең сумлык 3 компенсация бирелгән.