ЯҢАЛЫКЛАР

2009 елның дүрт ае эчендә генә дә Татарстан Республикасы Гражданнар оборонасы эшләре һәм гадәттән тыш хәлләр министрлыгы хезмәтләре юл-транспорт һәлакәтләренә бәйле булган 360 коткару чарасы үткәргән. Шуның нәтиҗәсендә 198 кеше коткарылган. Бүген юл хәрәкәте иминлеген тәэмин итү буенча Татарстан Республикасы хөкүмәт комиссиясе һәм Татарстан Республикасы Эчке эшләр министрлыгы, Татарстан Республикасы Сәламәтлек саклау министрлыгы, Татарстан Республикасы Мәгариф һәм фән министрлыгы, Татарстан Республикасы Транспорт һәм юл хуҗалыгы министрлыгының "Татарстан Республикасында "2006-2012 елларда юл хәрәкәте иминлеген арттыру" Федераль максатчан программасын үтәүнең барышы турында" дигән темага үткәрелгән уртак утырышында бу турыда Татарстан Республикасы Гадәттән тыш хәлләр министрлыгы башлыгы Рафис Хәбибуллин әйтте.

Бүген Казанда (“Гранд-Отель” нең конференц-залы) Татарстан һәм Саксония Ирекле дәүләте арасында Татарстан Республикасында Машина төзелеше/производство техникасы буенча компетенция үзәген төзергә ниятләү турындагы беркетмәгә кул куелды. Документка республикабыз ягыннан – Татарстан Республикасының сәнәгать һәм сәүдә министры Равил Зарипов, Саксония Ирекле дәүләте ягыннан Саксониянең икътисад һәм хезмәт министры Томас Юрк кул куйды.
Беркетмәгә Саксония һәм Татарстан Республикасы эшлекле даирәләре вәкилләренең Татарстан-Саксония эшлекле форумы кысаларында кул куелды.

Бүген Татарстан Республикасының хөкүмәт башлыгы Рөстәм Миңнеханов Татарстан Республикасы Министрлар Кабинетында Саксония Ирекле дәүләте Премьер-министры Станислав Тиллих белән очрашты.
Очрашу ахырында тышкы икътисади эшчәнлек буенча Татарстан Республикасы Премьер-министры Искәндәр Мөфлиханов хәбәр иткәнчә, анда икътисад һәм мәдәниятнең күп кенә юнәлешләре буенча хезмәттәшлек итү мәсьәләләре турында сүз барган.

Татарстан Республикасы икътисадның реаль секторында кече һәм урта эшмәкәрлек өлешен арттырачак. Бүген кече һәм урта эшмәкәрлек буенча Бөтенроссия форумы кысаларында үткәрелгән панель дискуссиясендә бу турыда Татарстан Премьер-министры Рөстәм Миңнеханов әйтте.

Бүген Татарстан Республикасы Премьер-министры Рөстәм Миңнеханов кече һәм урта эшмәкәрлек буенча Бөтенроссия форумында катнашачак. Әлеге чара Мәскәүдә, Халыкара сәүдә үзәгендә була.
Форумда Татарстан Республикасын шулай ук Татарстан Республикасы Кече һәм урта эшмәкәрлек комитеты җитәкчесе Тимур Шаһивәлиев тәкъдим итә.

2009 елда Татарстанда барлык торак программаларын тормышка ашыруга 15,1 млрд сум күчерү планлаштырыла, бу 11952 гаиләгә яшәү шартларын яхшыртырга мөмкинлек бирәчәк. Бүген Татарстан Республикасы Министрлар Кабинетында узган брифингта бу турыда “Татарстан Республикасы Президенты каршындагы Дәүләт торак фонды” коммерцияле булмаган оешмасының башкарма директоры Тәлгать Абдуллин хәбәр итте.

Бүген Татарстан Республикасы Премьер-министры Рөстәм Миңнеханов Татарстан Республикасы Урман хуҗалыгы министрлыгы коллективына яңа җитәкчене тәкъдим итте. Министр итеп Валерий Власов билгеләнде. Валерий Власовның әлеге вазыйфага билгеләнүе турындагы Указга 2009 елның 20 нче апрелендә Татарстан Президенты Минтимер Шәймиев кул куйды.

Бүген Татарстан Республикасы Премьер-министры Рөстәм Миңнеханов республиканың кайбер муниципаль район башлыкларына күпфатирлы торак йортларга капиталь ремонт ясау программасына кертелгән эшләрне тизләтергә кушты. Бу турыда ул Татарстан Республикасы Министрлар Кабинетында узган атналык киңәшмәдә әйтте. Әлеге чара, республиканың барлык муниципаль районнарын тоташтырып, видеоконференцэлемтә режимында узды.

Бүген Татарстан Республикасы Министрлар Кабинетында Яр Чаллы (Татарстан Республикасы) һәм Ляочэн (Кытай Халык Республикасының Шаньдун провинциясе) шәһәрләре арасында дустанә мөнәсәбәтләр урнаштыру ниятләре турындагы Меморандумга кул куелды.
Документка Яр Чаллы мэры Илдар Халиков һәм Ляочэн мэры Сунн Юаньфан кул куйды.
Меморандумга кул кую тантанасы алдыннан Татарстан Премьер-министры Рөстәм Миңнеханов Шаньдун провинциясенең Ляочэн шәһәре мэры Сунн Юаньфан һәм Кытай делегациясе әгъзалары белән очрашты.

Дөньякүләм икътисади кризис тәэсир итмәсә, 2009 елда Татарстан Республикасының тулай төбәк продукты 1 триллионга кадәр җиткән булыр иде. Бүген “БДБ ның инновацион киңлеген үстерү. Бердәмлек илләре сәүдә-сәнәгать палаталарының роле һәм урыны” Халыкара форумын ачу тантанасында бу турыда Татарстан Президенты Минтимер Шәймиев әйтте.
Шуны искәртик: форум Татарстан башкаласы Казанда (“Корстон” мәдәни-күңел ачу үзәге) уза. Аны оештыручылар – Россия Сәүдә-сәнәгать палатасы, Татарстан Хөкүмәте һәм Татарстан Сәүдә-сәнәгать палатасы.