Татарстан Президенты Минтимер Шәймиев: “Без 2010 елга кече һәм урта бизнесның тулай төбәк продуктындагы өлешен 30 процентка кадәр җиткерү бурычын куйдык”

Дөньякүләм икътисади кризис тәэсир итмәсә, 2009 елда Татарстан Республикасының тулай төбәк продукты 1 триллионга кадәр җиткән булыр иде. Бүген “БДБ ның инновацион киңлеген үстерү. Бердәмлек илләре сәүдә-сәнәгать палаталарының роле һәм урыны” Халыкара форумын ачу тантанасында бу турыда Татарстан Президенты Минтимер Шәймиев әйтте.
Шуны искәртик: форум Татарстан башкаласы Казанда (“Корстон” мәдәни-күңел ачу үзәге) уза. Аны оештыручылар – Россия Сәүдә-сәнәгать палатасы, Татарстан Хөкүмәте һәм Татарстан Сәүдә-сәнәгать палатасы.
Әлеге чарада Россия Федерациясе Президентының Идел буе федераль округындагы вәкаләтле вәкиле Григорий Рапота, Россия Федерациясе Сәүдә-сәнәгать палатасы президенты Евгений Примаков, Татарстан Республикасы Премьер-министры Рөстәм Миңнеханов һәм башкалар катнаша.
Халыкара форумда катнашучыларны сәламләп узгач, Татарстан Президенты Минтимер Шәймиев 2008 елда республикада тулай төбәк продуктының 930 млрд. сум тәшкил итүен әйтте. Узган ел төп капиталга инвестицияләр 268 миллиардтан артып киткән.
Бүгенге көнгә республикада чит илдән инвестицияләр керткән 800 предприятие эшли, шуларның 126 сы БДБ илләренең бизнес көчләре катнашында эшчәнлек алып бара.
2008 елда Татарстанның тышкы сәүдә әйләнеше 21,3 млрд. АКШ доллары тәшкил иткән, шул исәптән 2,8 млрд. АКШ доллары БДБ илләренә туры килгән.
“Без инновацион икътисадка исәп тотып эш итәбез. Бу безнең стратегик юнәлешебез”, - диде Минтимер Шәймиев.
Ул нефтьне тирәнтен эшкәртү һәм экспортка юнәлдерелгән икътисадтан кире кайту өчен күп көч куярга кирәклеген әйтте.
“Якындагы 30 елда Татарстан елына 30 ар млн. тонна нефть чыгарачак. Бүгенге көндә без 30-32 млн. тонна нефтьнең бары тик 7 миллионын гына эшкәртәбез, һәм бу хәл безне канәгатьләндерми”, - диде Татарстан Республикасы Президенты. Түбән Камада Нефть химиясе һәм нефть эшкәртү заводлары комплексы проектын тормышка ашыру углеводородлар эшкәртү күләмен тагын 7 млн. тоннага арттырырга мөмкинлек бирәчәк. Тәүлек саен Комплекс төзелешендә 60 млн. сум тотыла. Минтимер Шәймиев шулай ук күптән түгел Комплекс чикләрендә нефть эшкәртү күләмен икеләтә арттыру (тагын бер завод төзелә) турында карар кабул ителүен әйтте. Шулай итеп, якын киләчәктә Татарстан елына 21 млн. тонна нефть эшкәртә алачак.
Республикада кече һәм урта эшмәкәрлеккә ярдәм итү турында сөйләгәндә, Минтимер Шәймиев Татарстанның 2010 елга кече һәм урта бизнесның тулай төбәк продуктындагы өлешен 30 процентка кадәр җиткерү бурычы куюын әйтеп узды.
Татарстан икътисадының тагын бер үсеш ноктасы – “Алабуга” махсус икътисади зонасын үстерү. Анда инде 8 резидент теркәлгән, аларның икесе (шул исәптән “Соллерс Алабуга” компаниясе) производствосын ачып җибәргән.
Татарстан Республикасы Президенты фикеренчә, киләчәктә Татарстан үсешендә инновацияләргә өстенлек бирелергә тиеш.
“БДБ ның инновацион киңлеген үстерү. Бердәмлек илләре сәүдә-сәнәгать палаталарының роле һәм урыны” Халыкара форумының пленар утырышын Татарстан Республикасы Премьер-министры Рөстәм Миңнеханов үткәрде.
Форумда докладлар белән башкарма комитет рәисе – БДБ ның башкарма сәркатибе С.Лебедев, Евразия икътисади берләшмәсенең генераль сәркатибе Т.Мансуров, Казахстан Сәүдә-сәнәгать палатасы президенты Е.Кожасбай, фән һәм фәнсыйдырышлы технологияләр буенча Россия Дәүләт Советы Комитетының рәис урынбасары И.Игошин, Украинаның икътисад министры урынбасары В.Мунтиян, фән-техника өлкәсендәге кече форма предприятиеләр үсешенә ярдәм итү фондының совет рәисе И.Бортник, Үзбәкстан Республикасының Россиядәге Гадәттән тыш һәм Вәкаләтле Вәкиле И.Неъматов чыгыш ясады.