Таксичыларның яңа төр рөхсәт язуы булу таләп ителә

Татарстанда җиңел машинада пассажир һәм багаж ташу белән шөгыльләнүче эшкуарларның һәм юридик затларның ТР Транспорт һәм юл хуҗалыгы министрлыгы тарафыннан бирелгән рөхсәт язуы булырга тиеш.

Бары 5 елга каралган шушы рөхсәт язуы (ул машина йөртү хокукы биргән таныклык (права) кебек итеп эшләнгән) республиканың икътисади зоналары (Казан һәм Чаллы агломерацияләре, Идел алды, Кама алды, Кама аръягы, Көньяк-Көнчыгыш икътисади зоналар) принцибында үзәкләштереп бирелә: Казан, Чаллы, Түбән Кама, Алабуга, Зәй, Буа, Арча, Мамадыш, Чистай, Әлмәт, Бөгелмә шәһәрләрендәге – барлыгы 11 муниципаль райондагы Башкарма комитетларда һәм ТР Транспорт һәм юл хуҗалыгы министрлыгында махсус кешеләр билгеләнгән.

Рөхсәт язуы алу өчен гариза языла, автотранспортның үз милке булуын раслаган документ яки лизинг компаниясе белән килешү һәм шәхесен раслый торган документ (әйтик, паспорт һ.б.) таләп ителә. Аерым алганда, рөхсәт язуы конкрет автомобильгә һәм конкрет кешегә гариза кабул ителгәннән соң 1 тәүлек эчендә бирелергә тиеш. Шул рәвешле, таксомотор хезмәтләре базарын рәсмиләштерү күздә тотыла.

Бүген ТР Хөкүмәте йортында республика муниципаль районнары белән берлектә видеоконференция режимында барган брифингта ТР транспорт һәм юл хуҗалыгы министры Ленар Сафин шундый яңалык җиткерде. Аның сүзләренчә, министрлык 8 декабрьдан башлап шундый документ бирә, хәзергә 100дән артык кеше гариза белән мөрәҗәгать иткән, муниципаль берәмлекләргә барлыгы 9 меңнән артык шундый документ өләшенгән. Ләкин, таксичылар Татарстанда 16-16,5 меңләп теркәлсә, чынлыкта алар саны 2 тапкыр чамасы күбрәк булуны исәпкә алып, яңа рөхсәт язуы 30 мең күләмендә әзерләнә. Шулай булгач, кулында 2-3 машина булганнар да рөхсәт язуын 2013 елның 1 гыйнварына кадәр бушлай алырга хокуклы. Рөхсәт язуы булмаганнарга карата исә административ хөкем каралган: физик затларга карата 5 мең сум, юридик затларга – 30 мең сумга кадәр.

Шул рәвешле, такси дәүләт техник тикшерүне һәр 6 ай саен узарга, техник яктан төзек һәм идарәсе сул яклы булырга тиеш, машинаның ян-ягында контраст төстә “шашкалар” ясалган, түбәсендә кызгылт-сары, ягъни әфлисун төсендә плафон-фонарь булырга, таксометр белән җиһазландырылырга тиеш; йөртүчесенең исә машина йөртү стажы, хезмәт һәм гражданлык законнарында каралганча документлар белән нигезләнеп, кимендә 3 ел яисә гомуми машина йөртүчелек стажы кимендә 5 ел булуы шарт. Моннан тыш, башка төр транспорт чарасында йөртүче буларак эшләсә, ул кеше таксида да эшләргә хокуклы түгел.

Иң мөһиме, бу таләпләр бүген такси хезмәтләреннән файдаланучыга финанс яктан берничек тә кагылмый, чөнки әлегә рөхсәт язуы бушлай бирелә. Ләкин шунысы бар: 2013 елның 1 гыйнварыннан такси кузовы сары яки ак төстә булырга тиеш. Болар һ.б. хакында быел 21 апрельдә кабул ителгән 69 нчы федераль законда, быел 10 октябрьдә кабул ителгән 77 нче ТР законында һәм аннары 6 декабрьдә ТР Министрлар Кабинетының 999 нчы күрсәтмәсендә аерым әйтелә.


Министр сүзләренчә, алга таба таксига шәһәр җәмәгать транспортына дип бүленгән өстенлекле юлдан йөрү хокукы бирү турында ЮХИДИ белән сөйләшүләр бара. "Бизнесларына әшәкелек эшләү нияте түгел бу, бары тәртип урнаштыру һәм пассажирлар иминлеге өчен җаваплылыкны арттыру. Такси уңайлы, куркынычсыз һәм кешене җәлеп итә торган булырга тиеш", - дип басым ясап әйтте Л.Сафин. Брифингта, шулай ук, аның яңарак билгеләнгән урынбасары Николай Стукалов та катнашты.