Рөстәм Миңнеханов Социалистик Хезмәт Герое Николай Фроловка автомобиль бүләк итте

Бүген Татарстан Президенты Рөстәм Миңнеханов Социалистик Хезмәт Герое Николай Фролов белән очрашты. Республика башлыгы аны 80 яшь тулуы белән котлады һәм күпьеллык актив эшчәнлеген, ветераннар хәрәкәте үсешенә сизелерлек өлеш кертүен исәпкә алып “Татарстан Республикасы алдындагы хезмәтләре өчен” орденын һәм яңа автомобиль тапшырды.

“Сез республиканың иң югары бүләгенә лаек. Сезгә сәламәтлек, актив тормыш позициясе телим”, - диде Рөстәм Миңнеханов. Үз чиратында, Николай Фролов ветераннарга күрсәтелгән ярдәм өчен Татарстан җитәкчелегенә рәхмәт белдерде һәм Рөстәм Миңнехановка ныклы сәламәтлек, эшендә уңышлар теләде.
Н.Фролов яшьтән үк зур сәнәгать предприятиесендә эшләргә хыяллануы турында сөйләде. Ул 1931 елның 13 декабрендә Татарстанның Югары Ослан районы Волково авылында туа. Мәктәпне тәмамлаганнан соң Казанга килә, “Спартак” аяк киемнәре комбинатына фрезерчы ярдәмчесе булып эшкә керә. Армиядә хезмәт итеп кайтканнан соң “Радиоприбор” заводына фрезерчы булып эшкә урнаша, анда озак еллар хезмәт куя. 1970 елда завод партия комитеты әгъзасы итеп сайлана. Эштәге батырлыгы өчен аңа Социалистик Хезмәт Герое дигән мактаулы исем бирелә. 1972-1991 елларда Н.Фролов – партия өлкә комитеты Бюросы әгъзасы. 2000 елда лаеклы ялга чыкканнан соң, ул совет рәисе урынбасары сыйфатында “Татарстан геройлары” иҗтимагый оешмасы тормышында актив катнаша.
Н.Фролов республика Президенты белән әңгәмә вакытында спорт белән актив шөгыльләнүе, җәен көн саен Иделдә су коенуы, футбол уйнавы хакында хәбәр итте. Ул 2013 елгы Универсиаданы үткәргәндә Казанга уңышлар теләде һәм үзенә бүләк ителгән автомобиль өчен рәхмәт белдерде.
Журналистларга биргән интервьюсында Николай Фролов бүген аның өчен республика җитәкчелеге оештырган зур бәйрәм булуын белдерде. Хәзерге вакытта ул яшьләр белән эшли. “Яшьләрне өлкәннәргә карата игътибарлырак булырга өйрәтәм, иҗтимагый эш башкаруның әһәмияте хакында сөйлим”, - диде очрашуның герое.

Очрашуда шулай ук ТР хезмәт, мәшгульлек һәм социаль яклау министры Айрат Шәфигуллин, ТР Президентының социаль мәсьәләләр буенча ярдәмчесе Татьяна Ларионова, “Татарстан геройлары” Иҗтимагый оешмасы рәисе Илдус Мостюков катнашты.