“ТР өчен иң яхшы илле инновацияле идея” республика конкурсының быелгы җиңүчеләре бүләкләнде

Бүген “Корстон”да фән һәм эшмәкәрлекне хөрмәтләү тантанасы узды. Биредә “Татарстан Республикасы өчен иң яхшы илле инновацияле идея” республика конкурсының быелгы җиңүчеләрен бүләкләделәр. Бәйрәм тантанасында ТР Президенты Рөстәм Миңнеханов, Премьер-министр Илдар Халиков, физика галиме, Россия Фәннәр академиясе вице-президенты, Нобель премиясе лауреаты Жорес Алферов, Фән-техника өлкәсендә кече формадагы предприятиеләр үсешенә ярдәм фонды генераль директоры Сергей Поляков, Россиянең һәм Ауропаның венчур индустриясе вәкилләре һ.б. кунаклар катнашты.

“Татарстан Республикасы өчен иң яхшы илле инновацияле идея” дигән VΙΙ республика бәйгесенә быел апрель аенда старт бирелгән иде. ТР Инвестиция-венчур фонды белән ТР Фәннәр академиясе уздыра торган бу традицион чараның масштаблары елдан-ел киңәя. 2005 елда аңа 490 заявка, 2006 елда заявка рәвешендә 621, 2007 елда – 694, 2008 елда -811, 2009 елда – 1273, 2010 елда – 1503 проект тәкъдим ителгән булса, быел алынган заявкалар саны 1696 га җиткән. Катнашучылар географиясе дә киңәя бара. Быел ул Россиянең 20 дән артык төбәген колачлый. Шулай ук АКШ ның Мэриленд штатыннан тәкъдим ителгәннәре дә бар.

ТР Инвестиция-венчур фонды директоры Айнур Әйделдинов иң күп заявкаларның химия-нефть химиясе, наноструктуралы технологияләр, телекоммуникацияләр, азык сәнәгате, авыл хуҗалыгы, биотехнологияләр юнәлешләре буенча алынуына игътибарны юнәлтте. Заявкалар бирүдә Казан илкүләм тикшеренү технология, техник университетлары, ТР Фәннәр академиясе аеруча зур активлык күрсәткән.

Быелгы конкурсның узганнарыннан төп аермасы - номинацияләр санының артуында. Традицион “Перспектива”, “Инновацияләр старты”, “Наноимпульс”, “Хезмәттәшлек”, “Елның иң яхшы ачышы”, “ТР социаль-икътисади үсеше”, “Мәгарифтә инновацияләр” номинацияләренә сигезенче булып “ Россиянең инновацияле төбәкләре ассоциациясе проектлары” номинациясе дә өстәлгән. Айнур Әйделдинов аңлатканча, яңа номинациядә әлеге ассоциация составына кергән Россиянең 7 төбәге (шул исәптән Татарстан) проектларын тәкъдим иткән. Экспертлар тарафыннан үткәрелгән җентекле анализ һәм сайлап алулар нәтиҗәсе буларак, быелгы конкурсның җиңүчеләре дип 180 проект табылган. Аларның авторлары бүген “Корстон” сәхнәсенә чакырылды.

Мәктәп укучыларының инновацияле фәнни-техник эшләре кабул ителә торган “Перспектива” номинациясе җиңүчеләрен ТР Президенты Рөстәм Миңнеханов бүләкләде. Әлеге номинациядә җиңгән иң яхшы 10 проект авторларына 25 шәр мең сум күләмендә акчалата премия һәм кубоклар тапшырылды. “Безнең төп бурыч: бу процесска үсеп килүче буынны - вузларны гына түгел, мәктәпләрне дә җәлеп итү. Без моңа ирештек”, - дип башлады сүзен Президент. Рөстәм Миңнеханов Нобель премиясе лауреаты Жорес Алферовка бүгенге тантанада катнашуы өчен рәхмәт белдереп, инновацияле проектлар конкурсларында катнашучылар дөньякүләм танылган шундый галимнәргә тиңләшергә омтылсын, дигән теләктә калды. “Алга таба конкурска алына торган заявкалар саны тагын да артыр, проектларның эчтәлеге тагын да кызыклырак һәм перспективалырак булыр”, - дигән ышаныч белдерде республика башлыгы.
“Елның иң яхшы ачышы” номинциясе җиңүчеләрен Нобель премиясе лауреаты Жорес Алферов бүләкләде. 2009-2010 елларда патент алган 10 проект авторларына кубоклар һәм 50 шәр мең сум күләмендә премия тапшырылды. “Инновацияле икътисад һәрвакыт фән белән тыгыз бәйләнештә. Бүген Россия бизнесы уйлап табуларга фән хезмәткәрләрен җәлеп итү буенча зирәк сәясәт алып барганда гына, илдә фәнни казанышларга нигезләнгән уңышлы бизнес булачак. Яңа уйлап табулар һәм инновацияле икътисад илгә чын мәгънәсендә бай һәм бәйсез булырга ярдәм итәчәк. Татарстан бу эштә алга таба да лидерларның берсе булып калдыр дип ышанам”, - диде галим.

Фәнни-техник проблемаларны чишүгә йөз тотучы проектлар катнашкан “Инновацияләр старты” номинациясендә иң яхшы 10 проект авторы кубоклар һәм 50 шәр мең сумлык премия белән бүләкләнде. Нанотехнологияләр өлкәсенә караган проектлар катнашкан “Наноимпульс” номинациясендә дә иң яхшы 10 проект авторы шулай ук кубоклар һәм 50 шәр мең сум премия белән билгеләп үтелде. “ТР Социаль-икътисади үсеше” номинациясендә республиканың социаль-икътисади һәм гуманитар үсешенә юнәлдерелгән проектлар бәяләнде. Нәтиҗәдә, сайлап алынган иң яхшы 10 проект авторлары кубоклар һәм 50 шәр мең сумлык премияләр алды. ТР сәнәгать предприятиеләре алдында торган проблемаларга чишелеш эзләүче проектлар “Хезмәттәшлек” номинациясендә бәяләнде. Иң яхшы 5 проект авторлары шулай ук кубоклар белән бергә 50 шәр мең сум күләмендә премиягә лаек булды. “Мәгарифтә инновацияләр” номинацияләрендә җиңгән иң яхшы ун проект авторы шулай ук кубок һәм 50 шәр мең сум күләмендә премия алды. “Россиянең инновацияле төбәкләре ассоциациясе проектлары” номинациясе җиңүчеләре дә 50 шәр мең сумлык премиягә лаек булды.

Быел да конкурсны оештыруда катнашкан “Ак Барс” банкы”, “Татнефтехиминвест-холдинг”, “Связьинвестнефтехим” ААҖ бәйгедә катнашучыларга үз премияләрен һәм исемле стипендияләрен булдырган. “Ак Барс” банкы 30 ар мең сумлык 10 исемле премия, “Татнефтехиминвест-холдинг” ярты ел дәвамында 5 әр мең сумлык 10 исемле стипендия, “Связьинвестнефтехим” шул ук чорга һәм шул ук суммадагы 10 стипендия бирә. Быел беренче тапкыр буларак Россиянең инновацияле төбәкләре ассоциациясе дә 50 шәр мең сумлык 10 премия булдырган.

Ел саен “Татарстан Республикасы өчен иң яхшы илле инновацияле идея” конкурсы кысаларында “Идея-1000” инновацияле проектлар программасы буенча да сайлап алу үткәрелә. Бүген анда “Яшьләр инновацияле проекты”, “Старт-1”, “Старт-2” номинацияләрендә җиңгән 60 автор бүләкләнде.