Идел буе федераль округы төбәкләре башлыклары Казанда вәкаләтләрне яңадан бүлешү турында фикер алышты

Бүген Казанның «Корстон» кунакханә-сәүдә-күңел ачу комплексында Россия Федерациясе Финанс министрлыгының бюджетара мөнәсәбәтләрне камилләштерү буенча киңәйтелгән утырышы узды. Аны РФ Финанс министры Антон Силуанов алып барды. Утырыш эшендә ТР Президенты Рөстәм Миңнеханов, РФ Президентының Идел буе федераль округындагы Тулы вәкаләтле вәкиле Михаил Бабич, Түбән Новогород өлкәсе губернаторы Валерий Шанцев, Чуашстан Республикасы Президенты Михаил Игнатьев, Пермь крае губернаторы Олег Чиркунов, Пенза өлкәсе губернаторы Василий Бочкарев, Саратов өлкәсе губернаторы Павел Ипатов, РФ төбәкләре муниципалитетлары администрацияләре башлыклары һәм башкалар катнашты.
Көн үзәгенә түбәндәге мәсьәләләр куелды: вәкаләтләр бүлешү, җирле бюджетлар: керем базасын ныгыту, вәкаләтләрне тапшыру, бюджетара мөнәсәбәтләр.

“Безнең максат – Дәүләт Советында бу мәсьәләләр хакында фикер алышу алдыннан позицияләрне формалаштыру”, - дип билгеләп үтте РФ Финанс министры. Антон Силуанов билгеләп узганча, федераль хакимият вәкаләтләрнең күп өлешен субъектларга бирүне кирәк дип саный, чөнки нәкъ менә төбәкләрдә кайсы дәүләт хезмәтенә өстенлек бирү ныграк аңлашыла.

РФ Финанс министры фикеренчә, вәкаләтләрне субъектларга тапшыру процедурасын да гадиләштерү мөһим. “Бүгенге көндә вәкаләтләрен гамәлгә ашыру өчен субъектларга бирелүче субвенцияләр саны бик күп, нәтиҗәдә шактый зур бюрократик йөкләнеш кичерергә туры килә, 10 вәкаләт күчсә 10 субвенция дигән сүз, һәр субвенция хисап таләп итә. Шуңа күрә без бер федераль органга бер субвенция турында сүз алып барабыз. Вәкаләтләр үтәлеше сыйфаты өчен дә РФ субъектларыннан сорау алыначак”, - дип белдерде Антон Силуанов.

Субсидияләр мәсьәләсендә шул ук хәл. “Һәр субсидия хисап таләп итә, бу исә РФ субъектларын эшчәнлектән игътибарын читләштерә, чиксез кәгазь язмалары артык мәшәкатьләр тудыра. Без субсидияләр бирүне бер программа кысаларына кертергә тиешбез”, - ди ул. Аның әйтүенчә, РФ Президенты да федераль органнардан - субъектларга, субъектлардан муниципалитетларга субсидия бирү процедурасын гадиләштерү әһәмиятенә басым ясаган.

Җирле бюджетларда хосусый вәкаләтләрне үтәү өчен ресурслар, салым мөмкинлекләре җитәрлек түгел. “Авыл җирлекләренә гражданнар тормышына кагылышлы гади вәкаләтләрне калдыру кирәк, алардан сорау да азрак булачак”, - дип ассызыклый Антон Силуанов.