Рөстәм Миңнеханов РФ Дәүләт Советы утырышында катнашты

Бүген ТР Президенты Рөстәм Миңнеханов РФ Дәүләт Советы утырышында катнашты. Әлеге утырышта РФ Президенты Дмитрий Медведев Россия алда торган децентрализациянең төп алымнарын һәм проблемаларын билгеләде.

“Кайбер очракларда аерым федераль вәкаләтләрне төбәкләр дәрәҗәсендә үтәү тагын да нәтиҗәлерәк булырга мөмкин”, - диде Д.Медведев.

Дмитрий Медведев билгеләп үткәнчә, “финанс децентрализациясе төбәкләргә без алга таба бергәләп бүләчәк тиеннәр түгел, ә тулы канлы эшчәнлек алып бару өчен сизелерлек күләмдә өстәмә чаралар бирергә тиеш”. “Бары тик шул очракта гына децентрализациянең файдасы булачак”, - дип ассызыклады ул.

Россия Президенты фикеренчә, төбәкләргә федераль субсидияләрдән файдалануда күбрәк мөстәкыйльлек бирергә кирәк. Бу төбәкләрнең муниципалитетлар белән мөнәсәбәтләренә дә кагыла. “Мондый мөстәкыйльлекнең дәрәҗәсе турында һәм әлеге вәкаләтләрне гамәлгә ашыру механизмнарын ныклап уйларга кирәк”, - дип белдерле Д.Медведев.

Президент шулай ук төбәк һәм җирле бюджетларның керем чыганакларын киңәйтү проблемасының әһәмиятен билгеләп үтте. “Үземнең Юлламада мин төбәк һәм җирле бюджетларның өстәмә керем чыганакларының 1 триллион сумга кадәр тәшкил итәргә мөмкинлеге турында әйттем. Әмма бу чыганакларны без әле табарга тиеш. Кайбер салымнарны яңадан бүлү һәм кайбер федераль ташламаларны гамәлдән чыгаруны да кертеп, әлеге чыганакларны кайдан эзләп булуы хакында шактый тәкъдимнәр бар”, - диде Медведев.