Киләсе ел башыннан гражданнарга Күчемсез милеккә һәм алар белән бәйле операцияләргә хокукларның бердәм дәүләт реестрыннан мәгълүмат он-лайн режимында бирелә башлый

Киләчәктә Күчемсез милеккә һәм алар белән бәйле операцияләргә хокукларның бердәм дәүләт реестрыннан гражданнарга һәм юридик затларга мәгълүмат Дәүләт теркәве, кадастр һәм картография буенча федераль хезмәтнең ТР идарәсе хезмәткәрләре катнашыннан башка гына, он-лайн режимында бирелә башлаячак. Бу хакта бүген ТР Хөкүмәте йортында узган брифингта Росреестрның ТР идарәсе җитәкчесе урынбасары Альберт Хәйретдинов белдерде.
Гражданнар дәүләт реестрыннан күчермә сорап мөрәҗәгать иткәннән соң 2-3 минут узуга, алар сораган документ инде әзер дә булачак. Бу мөмкинлектән татарстанлылар киләсе ел башыннан ук файдалана алачак.
Альберт Хәйретдинов сүзләренә караганда, бу бер яктан, мөрәҗәгать итүче гражданнар уңайлыгы өчен уйланылса, икенче яктан коррупция ихтималына юл калдырмый. Күчемсез милеккә һәм алар белән бәйле алыш-бирешләргә хокукларның бердәм дәүләт реестрындагы мәгълүматлар махсус мәгълүмат системасы рәвешендә Росреестр сайтында (www.rosreestr.org) урын алачак. Әлеге сервис күчемсез милек белән бәйле операцияләр санының һәм алар бәясенең ачыклыгын гына тәэмин итеп калмыйча, аларның структурасын да ача. Билгеле булганча, бүген күчемсез милек объектлары белән бәйле операцияләрнең барысы да Күчемсез милеккә һәм алар белән бәйле алыш-бирешләргә хокукларның бердәм дәүләт реестры аша уза.
Бүгенге көндә әлеге системаны эшләтеп җибәрүгә соңгы әзерлек эшләре-шәхси мәгълүматларның яклануын тикшерү бара. Дәүләт реестрының Росреестр сайтына чыгарылган мәгълүматлар базасында күчемсез милек объектларының төгәл адресы күрсәтелмәячәк.
Дәүләт теркәве, кадастр һәм картография буенча федераль хезмәтнең ТР идарәсе киләсе елда шулай ук Күчемсез милеккә һәм алар белән бәйле алыш-бирешләргә хокукларның бердәм дәүләт реестрының бөтен мәгълүматлар базасын үзәкләштерергә ниятли. Шуннан соң, республика халкы күчемсез милеккә хокукны теркәү мәсьәләсе белән идарәнең яки Кадастр палатасының төрле муниципалитетларда урнашкан теләсә кайсы территориаль бүлегенә мөрәҗәгать итә алачак.
Ниятләгән планнарын гамәлгә ашыру өчен Росреестр бүгенге көндә күчемсез милекнең бердәм федераль мәгълүмат базасын (ЕФИСН) төзүне дә алып бара. Ул Күчемсез милеккә һәм алар белән бәйле алыш-бирешләргә хокукларның бердәм дәүләт реестры белән Дәүләт күчемсез милек кадастрын берләштерүче эре интеграция проекты булачак. Аның төп максаты- гражданнарга күрсәтелә торган дәүләт хезмәтләренең сыйфатын күтәрү, он-лайн режимында кирәкле мәгълүматны бирү.