Башкарма хакимият һәм җирле үзидарә органнарының уртак чаралар планы үтәлеше контрольдә тотылачак

16 нчы ноябрь көнне Татарстан Президенты Рөстәм Миңнеханов катнашында ТР муниципаль берәмлекләренең VI корылтае узган иде. Бүген Татарстан Министрлар Кабинеты утырышының көн үзәгенә, корылтай нәтиҗәләре буенча башкарма хакимият һәм җирле үзидарә органнарының уртак чаралары планы турындагы мәсьәлә чыгарылды. Утырышны ТР Премьер-министры Илдар Халиков алып барды.

Премьер-министр билгеләп узганча, корылтай йомгаклары буенча чаралар планы төзелгән һәм кайбер юнәлешләр буенча эш алып барыла башлаган. Авыл җирлекләренә ноутбуклар тапшырылган. ТР муниципаль берәмлекләре башлыкларының хезмәт хакын арттыру мәсьәләсе уңай чишелешен тапты диярлек. “Дөрес, финанс ягыннан зур чыгымнар таләп итүче сораулар да бар-барын, тик шуны ныклы төстә әйтә алам: бер сорау да игътибар үзәгеннән читтә калмаячак. Уртак тырышлык белән аларны хәл итәчәкбез”, - дип ассызыклый Хөкүмәт башлыгы. Ул муниципаль берәмлек башлыкларын актив эшкә һәм югары үрләргә омтылырга өндәде.

Төп доклад белән ТР муниципаль берәмлекләре советы рәисе Минсәгыйть Шакиров хисап тотты. Ул искәртеп узганча, соңгы корылтайда җирле үзидарә реформасын тормышка ашыру барышында казанышлар һәм проблемалар җентекләп тикшерелгән. “Корылтай нәтиҗәләре күпчелек муниципалитетларның яңа шартларда авыл җирлекләре үсеше мәсьәләләрен нәтиҗәле төстә хәл итү мөмкинлегенә ия булуын күрсәтә. Корылтай нәтиҗәләрен игътибар белән өйрәнеп, аның карарлары үтәлеше буенча эш оештыруда уңай тәҗрибә күзәтелә”, - дип белдерде Минсәгыйть Шакиров.

Аның әйтүенчә, корылтай нәтиҗәләре буенча, 2012 нче елга Татарстан бюджетына, муниципалитетларның финанс тотрыклылыгын арттыруга йөз тоткан үзгәрешләр кертелгән. ТР Президент Аппараты һәм Министрлар Кабинеты белән берлектә уртак чаралар планы расланган. Ул 57 пункттан гыйбарәт. Минсәгыйть Шакиров билгеләп үткәнчә, муниципаль орган башлыкларына Татарстан Хакимияте вәкилләре белән берлектә, РФ Президенты Дмитрий Медведев Фәрманында билгеләнгән нигезләмәләр буенча федераль башкарма хакимият, РФ субъектлары һәм җирле үзидарә органнары арасында вәкаләтләр бүлешү буенча чаралар уздырырга туры киләчәк. “План муниципалитетларының төрле өлкәләрдәге киңкырлы эшчәнлеген колачлый. Аның кысаларында салым җыюны камилләштерү, салым һәм финанс хезмәтләре белән хезмәттәшлекне яхшыртуга юнәлдерелгән чаралар каралган. Планга шулай ук ТР Президентының торак йортларга, уку биналарына капиталь ремонт уздыру, авыл клублары төзелеше һәм төзекләндерү, авыл халкын эчәргә яраклы су белән тәэмин итү кебек республика программаларын гамәлгә ашыруда муниципалитетлар өлешен җанландыру турындагы йөкләмәләре дә кергән.

План үтәлеше квартал саен күзәтчелек астында булачак.