Рөстәм Миңнеханов Казанның кар чистарту техникасы күргәзмәсендә булды

Бүген Татарстан Президенты Рөстәм Миңнеханов Казанда кулланыла торган кар чистарту техникасы һәм урамнарны җыештыру технологиясе күргәзмәсендә булды. Республика башлыгы белән бергә яңа машиналар, реагентлар һәм башка экспонатларны “КАМАЗ” ААҖ генераль директоры Сергей Когогин, Казан мэры Илсур Метшин да карады.

Татарстан башкаласын яңа техника белән “КАМАЗ” мәйданчыкларында урнашкан “Бошунг КАМА” ҖЧҖ предприятиесе тәэмин итә.

Татарстан Президенты Рөстәм Миңнеханов кар чистарту техникасының сыйфатына югары бәя бирде һәм “КАМАЗ” шассиен куллану чит ил машиналары белән чагыштырганда эксплуатация чыгымнарын сизелерлек киметергә мөмкинлек бирәчәк, дип ассызыклады. Үз чиратында, “КАМАЗ” ААҖ генераль директоры Сергей Когогин хәбәр иткәнчә, Казан муниципаль хакимиятләренең техникага заказ бирүе “Бошунг КАМА” предприятиесенең зыянсыз эшли башлавын тәэмин иткән.

Күргәзмәдә шулай ук бозлавыкка каршы реагентлар һәм кар эретү машиналары да тәкъдим ителгән иде.

Журналистларга биргән интервьюсында Рөстәм Миңнеханов яңа техниканың быелгы бураннарга каршы көрәштәге зур өлешен билгеләп үтте. “Әлеге программа 1,5 миллиард сумга төште – 1 миллиард сум акчаны – республика, 500 миллионын шәһәр бүлеп бирде”, - дип ассызыклады Р.Миңнеханов һәм кар чистарту техникасын яңартуны дәвам итәргә кирәк дип белдерде.

“Чаллыда шундый ук программаны гамәлгә ашыру эшенә керештеләр инде, бу Россиянең барлык шәһәрләре өчен үрнәк булыр дип уйлыйм. Мондый техника Татарстанда да, Россиянең башка төбәкләрендә дә эшләр дип өметләнәм”, - диде республика Президенты.