РФ энергетика министры урынбасары Сергей Кудряшов: "ТАНЕКО" - Россиядә нефть эшкәртү өлкәсендә соңгы 20 елдагы иң зур проект"

Бүген ТР Президенты Рөстәм Миңнеханов һәм РФ энергетика министры урынбасары Сергей Кудряшов эш сәфәре белән Түбән Камада булды. Алар шәһәрнең эре предприятиеләре белән танышты һәм “ТАНЕКО” нефть эшкәртү комплексының ирешелгән күләмнәре һәм продукция күрсәткечләре хакында фикер алышты.

Кунаклар беренчеләрдән булып ТАНЕКО” нефть эшкәртү комплексының үзәк оператор бүлмәсендә булды. 900 квадрат метр мәйданны биләгән бинада дистәләгән компьютер урнашкан, алар бөтен заводны контрольдә тота. Аннары кунаклар предприятие эшчеләре ел саен үз белемен арттыра һәм осталыгын чарлый торган укыту сыйныфын карады. Шуннан соң С.Кудряшов һәм Р.Миңнеханов иң яңа чит ил җиһазлары куелган лаборатория белән танышты.

Комплекс белән танышып чыкканнан соң Түбән Каманың эре предприятиеләре җитәкчеләре, шулай ук ТР Премьер-министры урынбасары – энергетика министры Илшат Фәрдиев, “Татнефть” ААҖ генераль директоры Шәфәгать Тәһаутдинов һәм “ТАНЕКО” ААҖ генераль директоры Хәмзә Баһманов катнашында киңәйтелгән киңәшмә узды. Киңәшмәдә катнашучылар “ТАНЕКО” комплексының алдагы перспективалары хакында фикер алышты һәм башка мәсьәләләрне карады. Предприятие генераль директоры Хәмзә Баһманов төп доклад белән чыгыш ясады. Ул бүгенге көндә комплекста 2 миллион 80 мең тонна нефть эшкәртелүе хакында хәбәр итте. Җитештерелгән барлык продукция дәүләт стандартлары таләпләренә җавап бирә.

Киңәшмәдән соң үткәрелгән журналистлар белән әңгәмәдә С.Кудряшов “ТАНЕКО” комплексының ролен югары бәяләде. РФ энергетика министры урынбасары шулай ук проектны гамәлгә ашыруда катнашы булган һәркемнең гаять зур хезмәтен рәхмәт сүзләре белән билгеләп үтте.

ТР Президенты Рөстәм Миңнеханов журналистларга Татарстанның алдагы үсеше өчен “ТАНЕКО”ның әһәмияте хакында сөйләде. РФ Хөкүмәте Рәисе Владимир Путин тарафыннан куелган бурычлар нигезендә, ТР алдында 2015 ел ахырына тулаем төбәк продуктын 2 триллион сумга җиткерү бурычы тора. “ТАНЕКО” кебек югары технологияле һәм масштаблы проектлардан башка әлеге бурычны хәл итү мөмкин түгел. “ТАНЕКО” комплексының беренче чираты эшли башлау – нефть эшкәртүнең тирәнлеген 97 процентка җиткерү юлында иң мөһим адым”, - дип ассызыклады Рөстәм Миңнеханов.