Илдар Халиков: "Юстиция министрлыгы республиканың законнар базасын тәртиптә тота"

Бүген Татарстан Юстиция министрлыгының коллегия утырышы, республика министрлык һәм ведомстволарының ел йомгакларына багышланган киңәшмәләренә старт бирде. 2011 елгы эшчәнлек нәтиҗәләренә һәм 2012 нче елгы бурычларга багышланган коллегия утырышында ТР Президенты вазифаларын башкаручы - ТР Премьер-министры Илдар Халиков катнашты.

Төп доклад белән ТР Юстиция министры Мидхәт Корманов чыгыш ясады.

Икенче ел рәттән ТР Министрлар Кабинетының закон проектлары эшчәнлеге планы 100 процент дәрәҗәсендә үтәлә. ТР Дәүләт Советы депутатларына карауга ТР Министрлар Кабинетыннан 14 закон кертелгән – 12 се кабул ителгән.

2011 елда юстиция министрлыгы 2636 норматив хокукый актка экспертиза уздырган. Министрлык тарафыннан 75 норматив хокукый акт проекты эшләнгән, шул исәптән 4 федераль закон проекты, 1 РФ Хөкүмәте боерыгы проекты, 5 ТР Президенты Указы проекты, 40 ТР Законнары проекты, 21 ТР Министрлар Кабинеты Карары проекты, 4 ТР Министрлары Кабинеты боерыгы проекты.

“Министрлык тарафыннан ТР законнарына инкорпорация максаты белән, 1917 нче елдан алып, 1930 нчы елга кадәр чорда кабул ителгән ТАССР Закон актларына яки аларның аерым положениеләренә анализ ясау эше башкарылды. Нәтиҗәдә ТАССР ның 25 закон асты норматив хокукый актының гамәлдән чыкканлыгын тану зарурлыгы шәрехләнде”, - дип белдерде Мидхәт Корманов.

“Министрлык эшчәнлегенең төп юнәлеше – ТР муниципаль норматив хокукый актлар исемлеген оештыру һәм алып бару. Теркәү кенәгәсенә 2006-2011 елларда дөнья күргән муниципаль норматив хокукый актларны кертү буенча зур эш башкарылды. 2012 елның 1 нче гыйнварына исемлеккә барлыгы 30 477 акт кертелгән. Узган елда муниципаль норматив хокукый актлар исемлеген 15646 акт тулыландырды”, - дип бәян итте министр.

Ведомство норма чыгару эшчәнлеген дә дәвам итә. Республика дәүләт хакимияте башкарма органнарыннан дәүләт теркәвенә 421 норматив хокукый акт килеп ирешкән, аларның 317 се теркәлгән, дәүләт реестрына кертелгән һәм басылып чыккан.

“2011 нче елның декабрендә “ТР муниципаль норматив хокукый актлар исемлеге турындагы” Законга, теркәлер алдыннан мондый актларга юридик экспертиза үткәрү буенча таләпләрдән гыйбарәт булган үзгәрешләр кертелде. Муниципаль актларның закон таләпләренә җавап бирмәве ачыкланган очракта, җирле үзидарә органнары аларны тәртипкә китерергә тиеш булачак”, - ди Мидхәт Корманов.

ТР Юстиция министрлыгы ТР норматив хокукый актларының бердәм банкын алып бару өчен дә җаваплы. Былтыр Бердәм банкка 1747 норматив хокукый акт кертелгән.

2011 елның 30 июлендә норма чыгару эшчәнлеген алып барганда ТР прокуратурасы белән хезмәттәшлек турында килешү рәсмиләштерелгән, аның нигезендә министрлык һәм ведомстволарның барлык норматив хокукый актлары теркәлүгә кадәр прокуратурага юлланачак. Узган елда министрлык һәм ведомстволарның 317 норматив хокукый акты теркәлгән.

2011 елда министрлык тарафыннан җирле үзидарә реформасын гамәлгә ашыру процессында муниципаль берәмлекләргә хокукый ярдәм күрсәтү буенча җитди эш башкарылган. Министрлык хезмәткәрләре җирле үзидарәнең 2 меңнән артык хокукый актын эшләүдә катнашкан, 1,5 меңнән артык норматив хокукый акт проектына хокукый экспертиза үткәрелгән.

Мидхәт Корманов Татарстанның норматив хокукый актларын махсуслаштырылган сайтта рәсми төстә бастырып чыгаруны тәкъдим итте, бу моңарчы бу максатларда кулланылган басма ММЧ ны алмаштыру мөмкинлеген бирер иде. Илдар Халиков исә министрның бу фикерен куәтләп, узган елда мондый тәҗрибә беренче тапкыр федераль үзәк дәрәҗәсендә эшкә җигелүен һәм хәзер инде төбәк дәрәҗәсендә кулланыла башлана алуын билгеләп узды. Халиков интернет-ресурска үтемлелекне тәэмин итәргә һәм хатларны дәүләт һәм муниципаль оешмаларга мәҗбүри төстә юллау күрсәтмәсен бирде.

Министрлыкка административ комиссия эшчәнлеген оештыру буенча җирле үзидарә органнарына күчкән дәүләт вәкаләтләре үтәлеше өстеннән контроль дә йөкләнгән. Бу юнәлештә Казан шәһәренә, Азнакай, Актаныш, Әлки, Арча, Балтач, Зәй, Минзәлә, Мөслим, Балык Бистәсе, Сарман, Теләче муниципаль районнарына административ комиссия эшчәнлекләрен тикшерү оештырылган. Алар барышында комиссияләр тарафыннан административ хокук бозулар турында федераль һәм республика законнары таләпләре үтәлеше өйрәнелгән.