Илдар Халиков: “Быел 1 июльдән ведомствоара багланышларга әзер булу таләп ителә"

ТР Министрлар Кабинетының гражданлык хәле турында акт теркәү идарәсендә бүген коллегия утырышы булып, анда узган елдагы эшчәнлек нәтиҗәләре игълан ителде һәм 2012 елга бурычлар куелды.

Төп хисап белән чыккан идарә башлыгы Эльмира Зарипова билгеләп үткәнчә, быел 1 гыйнвар мәгълүматлары буенча, Татарстанда гражданлык хәле турында актлар дәүләт теркәвен ЗАГСның 45 органы һәм муниципаль берәмлекләрдәге шәһәр һәм авыл җирле үзидарәләренең 903 органы башкара. Узган елда республикада гражданлык хәле турында теркәлгән 158652 актның 326626сы юридик әһәмияттә санала.

Элек тәнкыйтьләнеп, “ТР ЗАГС автоматлаштырылган мәгълүмат системасы”н кулланылышка киңрәк кертүне 2011 ел башына бурыч итеп куелган булса, бу юнәлештәге эш нәтиҗәләре куанырлык: 1922 елдан 2010 елга кадәр вакытта теркәлгән гражданлык хәле турындагы актларны цифрлаштыру ел башындагы 39 проценттан декабрь ахырына 59 процентка җиткерелгән һәм эш дәвам иттерелә. Бүгенгә гражданлык хәле турындагы 2,6 млн. архив язмасы электрон вариантка әйләндереп, системага кертелгән. ТР Премьер-министры урынбасары – ТР мәгълүматлаштыру һәм элемтә министры Николай Никифоров чыгышында игълан иткәнчә, республикада 86 электрон сервис булып (http://uslugi.tatar.ru), татарстанлыларның яртысыннан артыгы дәүләт хезмәтләренең электрон юлын сайлый. Нәтиҗәдә, 10,5млн. хезмәт күрсәтелгән, шулардан электрон юл белән 136 мең гариза бирелгән, аларның 19,4 меңе ЗАГС органнарына нисбәтле һ.б. Мәсәлән, быел гына да ЗАГС органнарына чиратка 3376 кеше электрон гариза белән мөрәҗәгать иткән, былтыр ел башына 50 пар гариза бирсә, ел ахырына – 2 меңнән артык, язылышу көнен һәм вакытын броньлау буенча электрон хезмәттән - 19,2 мең пар. Гомумән, министр фикеренчә, ЗАГС органнары республикада электрон хезмәт күрсәтүдә һәм шуның буенча кадрлар әзерләүдә дәүләтнең башка органнары арасында үрнәк булырлык.

Идарә башлыгы Эльмира Зарипова чыгышында 2012 елда ТР ЗАГС, ТР Мәгълүматлаштыру һәм элемтә министрлыгы, ТР Сәламәтлек саклау министрлыгы, ТР Финанс министрлыгы, ТР Хәрби комиссариаты, ТР Үзәк сайлау комиссиясе, Федераль статистика хезмәтенең ТР буенча территориаль органы, Россия Пенсия фондының ТР бүлеге, Россия федераль салым хезмәтенең ТР буенча идарәсе белән дәүләт мәгълүмат системалары арасында багланышлар урнаштыру мәсьәләсенә игътибарны юнәлтте һәм коллегия утырышы резолюциясендә аның һ.б. уртак эшчәнлекләр буенча сроклар тәгаенләнде (утырышта әлеге министрлык һәм ведомстволары җитәкчеләре дә катнашты). Шулай ук ТР Юстиция министрлыгы белән берлектә ЗАГС бүлекләре җитәкчеләре өчен гражданлык хәле актларын теркәү мәсьәләләре һәм халыкара хокукый ярдәм күрсәтү буенча практик семинарлар уздыру турында сүз булды.

ТР Президенты вазифаларын башкаручы - ТР Премьер-министры Илдар Халиков соңыннан сүз алып, соңгы елда ЗАГС органнары турында начар сүз әйтелмәде, электрон хезмәтләр күрсәтү өлкәсендә ЗАГС белән ЮХИДИ кебек органнар – лидер, диде. Алга таба кадрлар әзерләү һәм программалы идарә үзләштерү мәсьәләсе актуаль, чөнки 1 генә хәреф, 1 генә сан яки өтер дә буталчыклар китереп чыгарырга, эш сыйфатына зыян салырга мөмкин. Быел 1 июльдән ведомствоара багланышларга әзер булу таләп ителә, диде Премьер.

“Булгария” теплоходы һәлакәтеннән соң үзләре белеп тиз арада халыкка ярдәм оештырылуын һәм ЗАГС хезмәткәрләренә еш кына психологик ярдәм дә күрсәтергә туры килүен, гомумән, республика гражданнары турында тулы мәгълүмат әлеге органнар карамагында булуын билгеләп үтеп, ТР Хөкүмәте җитәкчесе шундый авыр чакта хезмәте кергәннәргә рәхмәт белдерде. Соңыннан И.Халиков бер төркем ЗАГС органнары хезмәткәрләренә ТР һәм РФ бүләкләрен тапшырды.